حوزہ نیوز ایجنسی کی رپورٹ کے مطابق، آیت اللہ العظمیٰ سید موسیٰ شبیری زنجانی رضوان اللہ تعالیٰ علیہ کے انتقال پر رہبر انقلاب اسلامی آیت اللہ سید مجتبیٰ خامنہ ای نے تعزیتی پیغام جاری کرتے ہوئے مرحوم کی علمی و اخلاقی خدمات کو خراجِ عقیدت پیش کیا۔
آیت اللہ سید مجتبیٰ خامنہ ای کے تعزیتی پیغام کا متن درج ذیل ہے:
بسم اللہ الرحمن الرحیم
استاد محترم، فقیہ عالی مقام حضرت آیت اللہ العظمیٰ شبیری رضوان اللہ تعالیٰ علیہ کے انتقال کی افسوس ناک خبر موصول ہوئی۔ یہ بزرگ عالم اپنی عمر کے ابتدائی چند سالوں کے علاوہ پوری بابرکت زندگی علم حاصل کرنے، علم سکھانے اور تحقیق کے راستے میں گزارتے رہے اور ہمیشہ اپنے ہم عمر و ہم عصر افراد اور اساتذہ کی جانب سے ایک محقق اور گہری نظر رکھنے والی شخصیت کے طور پر پہچانے جاتے رہے۔
احکامِ شرعی کے استنباط سے متعلق مختلف علوم و فنون پر ان کی گرفت باریکیوں اور دقیق نکات کے لحاظ کے ساتھ تھی۔ یہ بزرگ عالم کہ جب حلقہ درس میں حتی کہ حاضرین کی تعداد چند افراد سے زیادہ نہیں ہوتی تھی، اس وقت بھی تتبع اور تحقیق و تدقیق کی مجالس کے طور پر پہچانے جاتے تھے اور حقیقتاً بھی ایسے ہی تھے۔
الحمدللہ، گزشتہ تقریباً تین دہائیوں سے کچھ زیادہ عرصے کے دوران بہت سے افراد کو یہ توفیق حاصل ہوئی کہ وہ اپنی استعداد کے مطابق ان کے قیمتی وجود سے استفادہ کریں اور اپنے علمی حلقوں اور تدریس کے لیے ان سے زادِ راہ حاصل کریں۔ ان کی نشست، فیض پہنچانے اور فیض حاصل کرنے کی نشست تھی، یہاں تک کہ اس وقت بھی جب وہ درس کے بعد پیدل چلتے ہوئے اپنے گھر کی طرف جاتے تھے۔ ان کے مسلمہ علمی مقام کے علاوہ، طلبہ اور فضلا کے ساتھ ان کا تواضع سے بھرا اور پدرانہ برتاؤ بھی ایک نمایاں اور سبق آموز امر تھا۔
بے شک اس ممتاز شخصیت کی رحلت نے عصر حاضر میں شیعہ کے صفِ اوّل کے محققین کی صف میں ایک خلا پیدا کر دیا ہے، جس کا ازالہ شاید طویل عرصے تک ممکن نہ ہو۔ میں اس مصیبت پر اپنے آقا حضرت ولی عصر عجل اللہ تعالیٰ فرجہ الشریف، حوزات علمیہ اور بالخصوص ان کے شاگردوں، عقیدت مندوں اور خصوصاً اس عالم اور عالم پرور گھرانے کی خدمت میں تعزیت پیش کرتا ہوں اور بارگاہِ حق جلّ جلالہ سے اس بزرگوار کے درجات کی بلندی کی دعا کرتا ہوں۔
سید مجتبیٰ حسینی خامنہ ای
22/ستمبر/2026
آپ کا تبصرہ