بنگال کے جنوبی چوبیس پرگنہ میں ’’رحمت للعالمین‘‘ سیمینار کا انعقاد

حوزہ نیوز ایجنسی کی رپورٹ کے مطابق، جنوبی 24 پرگنہ کے راجنگر میں حضرت محمد مصطفیٰ صلی اللہ علیہ وآلہ وسلم کی سیرتِ طیبہ، اسوۂ حسنہ، علم، قیادت اور انسانیت کے لیے آپ صلی اللہ علیہ وآلہ وسلم کی بے مثال خدمات کو اجاگر کرنے کے لیے ’’رحمت للعالمین‘‘ کے عنوان سے ایک علمی و فکری سیمینار منعقد ہوا، جس میں مختلف طبقہ ہائے زندگی سے تعلق رکھنے والے افراد نے شرکت کی۔

ضلع جنوبی 24 پرگنہ کے کولپی تھانہ کے تحت راجنگر کے علاقے میں منعقدہ اس سیمینار میں مقامی افراد کے علاوہ مختلف شعبوں سے تعلق رکھنے والے سامعین نے شرکت کی۔ تقریب کا مقصد رسول اکرم حضرت محمد مصطفیٰ صلی اللہ علیہ وآلہ وسلم کی حیاتِ مبارکہ اور آپ صلی اللہ علیہ وآلہ وسلم کی جامع تعلیمات کو عصر حاضر کے تناظر میں سمجھنے اور انہیں عملی زندگی میں اپنانے کی ضرورت کو اجاگر کرنا تھا۔

سیمینار کے مہمانِ مقرر نورالاسلام اکیڈمی کے بانی و سکریٹری ڈاکٹر مولانا رضوان الاسلام خان نے اپنے خطاب میں رسول اکرم صلی اللہ علیہ وآلہ وسلم کی اطاعت اور سنتِ نبوی پر حقیقی معنوں میں عمل کرنے کی اہمیت بیان کی۔ انہوں نے کہا کہ نبی کریم صلی اللہ علیہ وآلہ وسلم کی پیروی اپنی خواہش یا سہولت کے مطابق نہیں، بلکہ اللہ تعالیٰ کے حکم کے مطابق ہونی چاہیے۔ انہوں نے قرآن کریم میں بیان ہونے والے ’’اولوالامر‘‘ کے موضوع پر بھی روشنی ڈالی اور احکامِ الٰہی، رسول اکرم صلی اللہ علیہ وآلہ وسلم کی اطاعت اور آپ صلی اللہ علیہ وآلہ وسلم کے بعد قیادت کے مسئلے کو اسلامی تعلیمات کی روشنی میں واضح کیا۔

دوسرے مقرر، ضلع ہاوڑہ کے الوبیریا سے تشریف لانے والے "راہِ حق" کے سکریٹری شیخ مشتاق احمد نے رسول اکرم صلی اللہ علیہ وآلہ وسلم کی ہمہ جہت شخصیت اور علم پر مبنی قیادت کے مختلف پہلوؤں پر گفتگو کی۔

انہوں نے کہا کہ نبی کریم صلی اللہ علیہ وآلہ وسلم کی حیاتِ مبارکہ کو صرف مذہبی رسومات تک محدود نہیں کیا جا سکتا، بلکہ اس میں علم، سماجی اصلاح، عدل و انصاف، معاشی اصول، انسانی اقدار اور معاشرے کی رہنمائی کے لیے جامع تعلیمات موجود ہیں۔

مقررین نے زور دیا کہ رسول اکرم صلی اللہ علیہ وآلہ وسلم کی سیرت کو سمجھنا اور آپ صلی اللہ علیہ وآلہ وسلم کی تعلیمات کو اپنی انفرادی و اجتماعی زندگی میں نافذ کرنا ہر مسلمان کی ذمہ داری ہے۔ انہوں نے حصولِ علم، حسنِ اخلاق، عدل و انصاف، انسانیت، باہمی احترام اور حق پر ثابت قدمی کو سیرتِ نبوی صلی اللہ علیہ وآلہ وسلم کے اہم پیغامات قرار دیا۔

سیمینار کے اختتام پر درود و سلام کا نذرانہ پیش کیا گیا اور معاشرے میں امن و امان، تمام شرکا کی فلاح و بہبود اور پوری انسانیت کی بھلائی کے لیے خصوصی دعا کی گئی۔

راجنگر میں منعقدہ ’’رحمت للعالمین‘‘ سیمینار نے شرکا کو رسول اکرم صلی اللہ علیہ وآلہ وسلم کی سیرتِ طیبہ، آپ صلی اللہ علیہ وآلہ وسلم کی علمی و اخلاقی تعلیمات اور انسانی معاشرے کے لیے آپ صلی اللہ علیہ وآلہ وسلم کی رہنمائی کو مزید گہرائی سے سمجھنے کا موقع فراہم کیا۔