حجۃ الاسلام سید صادق حسینی کا برہانپور کا دورہ؛ اہلِ بیتؑ کی تعلیمات پر علمی نشستیں اور مذہبی شخصیات سے ملاقات

حوزہ نیوز ایجنسی کی رپورٹ کے مطابق، ہندوستان کی ریاست مدھیہ پردیش کے تاریخی شہر برہانپور میں حجۃ الاسلام و المسلمین سید صادق حسینی نے اپنے دورے کے دوران مختلف دینی مدارس، صوفی خانقاہوں اور مذہبی مقامات کا دورہ کیا اور علمائے کرام، صوفی شخصیات اور اہلِ بیت علیہم السلام کے عقیدت مندوں سے ملاقاتیں کیں۔ اس موقع پر طلبہ کے درمیان اہلِ بیت علیہم السلام کی تعلیمات پر علمی نشستیں منعقد کی گئیں، جبکہ امامت و ولایتِ امام علی علیہ السلام سے متعلق اعتقادی سوالات کے جوابات بھی دیے گئے۔

برہانپور مدھیہ پردیش میں واقع ایک تاریخی شہر ہے، یہ شہر فاروقی اور مغلیہ ادوار میں سیاسی، علمی اور ثقافتی اہمیت کا حامل رہا ہے۔ برہانپور کا تصوف و عرفان سے بھی قدیم تعلق ہے اور اسے شیخ برہان الدین غریب سے منسوب کیا جاتا ہے، جو دہلی کے معروف صوفی بزرگ خواجہ نظام الدین اولیاء کے ممتاز مریدوں میں شمار ہوتے تھے۔

مغلیہ دور میں برہانپور عرفا، شعرا اور مشائخِ تصوف کی اہم نشست گاہوں میں شامل تھا۔ فراہم کردہ معلومات کے مطابق، شہر کی آبادی تقریباً پانچ لاکھ ہے، جن میں مسلمانوں کی تعداد تقریباً 70 فیصد بتائی جاتی ہے۔ شہر میں تقریباً 80 شیعہ خاندان آباد ہیں، جن کے پاس تین حسینیہ اور ایک مسجد موجود ہے۔

جامعہ اشرفیہ اظہار العلوم میں علمی نشستیں

حجۃ الاسلام و المسلمین سید صادق حسینی نے جامعہ اشرفیہ اظہار العلوم کا دورہ کیا، جہاں مختلف جماعتوں کے طلبہ کے درمیان اہلِ بیت علیہم السلام کی معرفت اور تعلیمات کے موضوع پر متعدد نشستیں منعقد کیں۔ ان نشستوں میں طلبہ سے خطاب کرتے ہوئے اہلِ بیت علیہم السلام کی سیرت و تعلیمات سے متعلق گفتگو کی گئی۔

جامعہ کے مدیر اویس احمد نظامی ہیں، جبکہ مولانا احمد اشرف اشرفی مدرسے کے ناظم اور سرپرست ہیں۔

شاہ بہاء الدین چشتی کے مزار اور خانقاہ کا دورہ

حجۃالاسلام سید صادق حسینی نے برہانپور کے معروف صوفی بزرگ شاہ بہاء الدین چشتی، جن کا انتقال 799 ہجری میں ہوا، ان کے مزار اور خانقاہ پر حاضری دی۔ اس موقع پر انہوں نے آستانے کے متولی اور ذمہ داران سے ملاقات کی اور ان کے ساتھ نشست میں شرکت کی۔

شاہ بہاء الدین باجن برہانپور کے معروف مشائخِ تصوف میں شمار ہوتے ہیں۔ روایت کے مطابق، مسلسل خاموشی اور گہری روحانی کیفیت کی وجہ سے انہیں ’’چُپ شاہ‘‘ یعنی خاموش بادشاہ کے نام سے بھی یاد کیا جاتا ہے۔ ان کا مزار اور خانقاہ آج بھی اہلِ عرفان کی توجہ کا مرکز ہے۔

چھوٹا اجمیر اور دیگر صوفی مقامات کی زیارت

حجۃ الاسلام و المسلمین سید صادق حسینی نے برہانپور کے علاقے لال باغ میں واقع چھوٹا اجمیر کا بھی دورہ کیا۔ یہ مقام علاقے کے اہم صوفی مراکز میں شمار ہوتا ہے، جہاں ہر جمعرات کو مختلف مذاہب سے تعلق رکھنے والے زائرین جمع ہوتے ہیں اور قوالی و سماع کی محفلیں منعقد ہوتی ہیں۔

انہوں نے مسعود شاہ مدنی کے مزار پر بھی حاضری دی، جو برہانپور میں تصوف اور اسلامی روحانیت سے وابستہ معروف مقامات میں شامل ہے۔

اسی طرح آستانہ عبدالغفور بخش اللہ شاہ اشرفی کا دورہ بھی کیا۔ عبدالغفور بخش اللہ شاہ اشرفی ہندوستان کے معروف صوفی بزرگوں میں شمار ہوتے تھے۔ ان کا انتقال 20 رمضان المبارک، 30 مئی 1986ء کو ہوا۔ ان کا آستانہ سلسلۂ اشرفیہ اور چشتیہ سے وابستہ مریدوں اور عقیدت مندوں کی توجہ کا مرکز ہے۔

سید عبدالباقی اشرفی سے متعدد ملاقاتیں

حجۃالاسلام سید صادق حسینی نے آستانہ اشرفیہ کے متولی سید عبدالباقی اشرفی سے متعدد ملاقاتیں کیں، جن میں شہر کی اہم شخصیات بھی شریک ہوئیں۔

سید عبدالباقی اشرفی ایک علمی و روحانی شخصیت ہونے کے ساتھ شاعر بھی ہیں اور ان کا شعری مجموعہ موجود ہے۔ وہ اہلِ بیت علیہم السلام سے محبت و عقیدت رکھتے ہیں اور ان کی مدح و منقبت میں متعدد اشعار کہہ چکے ہیں۔ ان کی عمر تقریباً 96 سال بتائی جاتی ہے اور شہر میں ان کے متعدد مرید اور عقیدت مند موجود ہیں۔

مسجد شاہی میں شہر کے قاضی سے ملاقات

حجۃ الاسلام و المسلمین سید صادق حسینی نے برہانپور کی مسجد شاہی کا دورہ کیا، جہاں شہر کے قاضی مولانا سید انوار اللہ بخاری سے ملاقات کی۔ اس موقع پر دیوبندی مکتبِ فکر سے وابستہ مدارس کے ذمہ داران بھی موجود تھے اور ان کے ساتھ تبادلۂ خیال کیا گیا۔

مسجد جعفری میں امامِ جمعہ سے ملاقات

سید صادق حسینی نے برہانپور میں شیعہ برادری کی مسجد جعفری کا دورہ کیا اور مسجد کے متولی عابد قزلباش کی موجودگی میں امامِ جمعہ حجۃ الاسلام حسن اختر سے ملاقات کی۔ اس موقع پر شہر کی شیعہ برادری اور اس کی دینی سرگرمیوں کے حوالے سے گفتگو ہوئی۔

امامت و ولایت سے متعلق اعتقادی نشستیں

سید عبدالباقی اشرفی کے پیروکاروں اور عقیدت مندوں کے ساتھ عقائد سے متعلق سوالات کے جوابات دینے کے لیے حجۃ الاسلام و المسلمین سید صادق حسینی نے دو تفصیلی نشستیں منعقد کیں۔ یہ نشستیں جمعرات اور جمعہ کے روز ہوئیں، جن میں 10 سے 12 افراد نے شرکت کی۔

ان نشستوں میں امامت، ولایتِ امام علی علیہ السلام اور آپؑ کی افضلیت سے متعلق اہم سوالات پر گفتگو کی گئی اور ان موضوعات پر اعتقادی دلائل پیش کیے گئے۔

مدرسہ اردو عربی سمنانی میں نشست

دورے کے آخری پروگراموں میں مدرسہ اردو عربی سمنانی میں مدرسے کے ذمہ داران اور طلبہ کے ساتھ نشست بھی شامل تھی۔ اس موقع پر علمی و دینی موضوعات پر گفتگو اور باہمی تبادلۂ خیال کیا گیا۔

حجۃ الاسلام و المسلمین سید صادق حسینی کے اس دورے میں دینی مدارس کے طلبہ سے رابطے، اہلِ بیت علیہم السلام کی تعلیمات کی ترویج، مختلف مذہبی و علمی شخصیات سے ملاقاتوں اور عقائد سے متعلق سوالات کے جوابات دینے پر توجہ دی گئی۔