حوزہ نیوز ایجنسی نے پاکستانی میڈیا سے نقل کیا ہے کہ نواب شاہ میں سرہاری ریلوے اسٹیشن کے قریب کراچی سے راولپنڈی جانے والی ہزارہ ایکسپریس نامی ٹرین کی 10 بوگیاں پٹڑی سے اتر کر الٹ گئیں جس کے نتیجے میں 35 افراد جاں بحق جبکہ متعدد زخمی ہوگئے۔

رپورٹ کے مطابق، حادثے کی اطلاع پر ایمبولینس و پولیس جائے حادثہ روانہ ہوگئی، جبکہ حادثے کے بعد اَپ ٹریک دیگر ٹرینوں کیلئے معطل ہوگیا۔ ریسکیو حکام کے مطابق زخمیوں کو قریبی اسپتال منتقل کردیا گیا ہے۔

حادثہ پیش آنے والی ہزارہ ایکسپریس میں 1000 سے زیادہ مسافر سوار تھے، حادثہ سرہاری اسٹیشن کے ایڈوانس سگنل کے قریب پیش آیا۔ ریلیف ٹرین کوٹری اور روہڑی سے حادثے کی طرف نکل چکی ہیں۔

ترجمان پاکستان ریلویز کراچی کے مطابق، بریک دیر سے لگنے کی وجہ سے حادثے نے شدت اختیار کی، متاثرہ ٹرین کی 8 سے زائد بوگیاں پٹری سے اتریں۔ حادثے کے نتیجے میں کراچی سے روانہ ہونے والی ٹرینوں میں تاخیر کا امکان ہے۔

ترجمان کا کہنا ہے کہ نقصان کا اندازہ ابھی نہیں لگایا جاسکتا، چند گھنٹوں میں مشینوں کی مدد سے متاثرہ بوگیوں کو اٹھالیا جائے گا۔

حادثے کے بعد وزیر اعلیٰ سندھ مراد علی شاہ امدادی کاموں کی نگرانی کرنے کے لئے ہیلی کاپٹر کے ذریعے خود جائے حادثہ پہنچ گئے۔

اطلاعات ہیں کہ جن زخمیوں کو طبی امداد کی ضرورت تھی اور جو ٹرین سے باہر تھے انہیں ہسپتال منتقل کیا جا چکا ہے۔ جو لوگ الٹی بوگیوں کے نیچے پھنسے ہوئے ہیں انہیں ریسکیو کیا جا رہا ہے۔

ریسکیو ٹرینز روہڑی اور کراچی سے بھی روانہ ہو چکی ہیں، اس موقع پر پاک فوج اور رینجرز کے دستے ہر ممکن مدد فراہم کر رہے ہیں۔

آئی جی ریلویز پولیس راؤ سردار علی خان نے ریلوے پولیس افسران کو جائے وقوع پر زیادہ سے زیادہ ریلویز پولیس کی نفری کو ریسکیو کے لئے روانہ کرنے کا حکم جاری کردیا۔

آئی جی ریلویز پولیس نے کہا ہے کہ ڈی آئی جی ساؤتھ کو فوری طور پر جائے وقوع پر روانہ کردیا گیا ہے، ایس ایس پی ریلویز کراچی کو بھی جائے وقوع کی طرف روانہ کردیا گیا ہے، ایس پی سکھر اور کراچی کو ہزارہ ایکسپریس حادثے میں امدادی سرگرمیوں میں حصّہ لینے کی ہدایت جاری کردی ہے، متعلقہ افسران کو زخمی مسافروں کو ہر طرح کی سہولت فراہم کرنے کے احکامات جاری کئے گئے ہیں۔

حادثے کے حوالے سے پاکستان کے سماجی ادارے ایدھی فاؤنڈیشن نے بتایا ہے کہ حادثے میں ہلاکتیں 35 ہوچکی ہیں۔ ایدھی انفارمیشن سروس کے مطابق 35 افراد کی لاشیں اور ساٹھ زخمیوں کو جائے حادثہ سے پی ایم سی اسپتال نواب شاہ منتقل کیا گیا ہے۔