حوزہ نیوز ایجنسی کی رپورٹ کے مطابق، اسلامی جمہوریہ ایران کی سپاہ پاسداران کے کمانڈر انچیف میجر جنرل حسین سلامی نے یومِ یکجہتی اساتذہ کی مناسبت سے منعقدہ کانفرنس سے خطاب میں ایرانی عظیم سائنسدان اور مجاہد ڈاکٹر مصطفٰی چمران کو زبردست الفاظ میں خراجِ عقیدت پیش کیا اور کہا کہ کسی بھی معاشرے کے شاندار مستقبل کا انحصار اس کے نوجوانوں اور دانشوروں پر ہوتا ہے۔ یہ ایک بھاری زمہ داری ہے جو ہمارے ملک کے تعلیمی اداروں کے ماہرین اور دانشوروں پر عائد ہوتی ہے۔
جنرل سلامی نے مزید کہا کہ انقلابِ اسلامی کا اصل مشن عالمی حالات کو الٰہی تعلیمات کے مطابق ایک روحانی نظام میں بدلنا ہے۔
انہوں نے کہا کہ ہم چاہتے ہیں کہ اخلاقی اور انسانی وقار جیسی عظیم اقدار ہمارے ملک کی شناخت کا ایک اہم حصہ ہوں۔ ہم دنیا کی کمزور اقوام کو عالمی استکبار کی جدید غلامی سے نجات دلانے کا علمبردار بننا چاہتے ہیں۔ ہم دنیا کے لوگوں کے لیے بیداری کا مرکزی نقطہ بننا چاہتے ہیں۔
سپاہ پاسدارانِ انقلاب اسلامی کے کمانڈر انچیف نے مزید کہا کہ شیطانی طاقتیں اپنی تمام تر صلاحیتوں کے ساتھ اسلامی انقلاب کے مقابلے میں آئیں لیکن اسے شکست فاش کا سامنا کرنا پڑا۔
انہوں نے کہا کہ دشمن کی زیادہ سے زیادہ دباؤ کی پالیسی نے ہمیں ایک غیر معمولی مقام پر پہنچا دیا ہے۔ اگر آج آپ دیکھتے ہیں کہ آپ عالمی محاذ آرائی کے عروج پر بھی محفوظ ہیں تو اس کا مطلب ہے کہ آپ کے پاس زبردست طاقت موجود ہے۔
جنرل سلامی نے کہا کہ حقیقت یہ ہے کہ آج ملک کی برآمدات اور درآمدات مکمل حفاظت کے ساتھ انجام دی جاتی ہیں، یہ آپ کی طاقت کا زبردست اظہار ہے اور اس معاملے میں ٹرمپ اور بائیڈن کے درمیان کوئی فرق نہیں ہے۔ ٹرمپ کے دور میں ہم نے عین الاسد پر حملہ کیا اور گلوبل ہاک کو نشانہ بنایا۔ انہوں نے محسوس کیا کہ اگر وہ ایران کے سامنے کھڑے ہونا چاہتے ہیں تو ایران عالمی معیشت پر اپنے اثر و رسوخ کو استعمال کرتے ہوئے انہیں شکست دے سکتا ہے۔
سپاہ پاسداران کے کمانڈر انچیف نے کہا کہ رہبرِ انقلابِ اسلامی ان تمام سنگین خطرات کے دل میں کھڑے تھے اور آگے بڑھ رہے ہیں۔
انہوں نے کہا کہ کورونا میں آپ نے دیکھا کہ امریکہ فرانس سے ماسک چوری کر کے ایئرپورٹس پر لے جا رہا تھا، لیکن ہم نے دنیا کے ترقی یافتہ ممالک سے بہتر طور پر کورونا کا مقابلہ کیا۔ وہ ہم پر سفارت کاری کے دروازے بند کرنا چاہتے تھے، لیکن ایسا نہ ہو سکا۔
جنرل سلامی نے کہا کہ ہم ایک ایسی دنیا میں ہیں جہاں صرف طاقت ہی معنی رکھتی ہے، جب دنیا آپ کی طاقت کو تسلیم کرے گی تو دشمن آپ کے سامنے ڈھیر ہو جائے گا۔
