حوزہ نیوز ایجنسی کی رپورٹ کے مطابق، اسلامی جمہوریہ ایران کے صدر ڈاکٹر مسعود پزشکیان نے انقلابِ اسلامی کی 46 ویں سالگرہ کے موقع پر غیر ملکی سفیروں کے اجلاس سے خطاب کرتے ہوئے کہا کہ خوشی کی بات ہے کہ آپ اس اہم موقع پر یہاں موجود ہیں اور امید ہے کہ آپ کی یہ موجودگی خطے اور عالمی امن سے متعلق مسائل کے حل میں مفید ثابت ہوگی۔
ایرانی صدر نے عالمی سطح پر دہشت گردوں کی حمایت کرنے والوں کی احمقانہ باتوں پر تعجب کرتے ہوئے کہا کہ ہمارے ملک میں بے پناہ قتل و غارت گری کرنے والے نہایت ہی بے شرمی سے اور الٹا ہم پر دہشت گردی کی حمایت کا الزام لگا رہے ہیں۔
ڈاکٹر مسعود پزشکیان نے کہا کہ انقلابِ اسلامی کی کامیابی کے پہلے دن سے ہی دشمن نے سازشیں کیں اور ہمیں دہشت گردی کا نشانہ بنایا، وہ نہیں چاہتے تھے کہ ہمارا ملک خودمختار ہو۔
انہوں نے ایران کے ایٹمی ہتھیاروں کے بارے میں صیہونی حکام کے بے بنیاد دعوؤں کی طرف اشارہ کرتے ہوئے کہا کہ غاصب اسرائیل نے خطے میں اپنے تمام ہمسایہ ممالک کی خود مختاری اور ارضی سالیمت کی خلاف ورزی کرتے ہوئے ان پر حملہ کیا۔
ایرانی صدر نے مزید کہا کہ غاصب صیہونی حکومت کے حامیوں نے فلسطینیوں کے قتل عام کو اس کا دفاع قرار دیا، لیکن سوال یہ ہے فلسطینیوں کو ان کی اپنی سرزمین سے کس نے نکالا اور لوگوں کو ان کے گھروں اور علاقوں سے جبری بے دخل کرنا کب سے انسانی حقوق میں شامل ہوگیا ہے؟
انہوں نے مزید کہا کہ دنیا اس وقت امن دیکھے گی جب ہم نسل، قبیلے، رنگ اور عقیدے سے بالاتر ہو کر انسانی حقوق کی قدر کریں گے اور ان کا احترام کریں گے۔
ڈاکٹر پزشکیان نے کہا کہ اگر ہم غزہ اور فلسطین کا دفاع کرتے ہیں تو در حقیقت ان مظلوموں کا دفاع کرتے ہیں، جن سے ان کا حق چھین لیا گیا ہے، دنیا میں جارحیت اور جبر کے خاتمے کے بغیر امن قائم نہیں ہوسکتا۔
آپ کا تبصرہ