حوزہ نیوز ایجنسی کی رپورٹ کے مطابق، اسلامی مزاحمتی تحریک حماس اور غاصب صیہونی حکومت کے درمیان پانے والے جنگ بندی معاہدے کے تحت، آج 3 غاصب صیہونی قیدیوں کے بدلے مزید 183 فلسطینی قیدی رہا ہوں گے۔
تفصیلات کے مطابق، غزہ میں اسلامی مزاحمتی تحریک حماس اور غاصب صیہونی حکومت کے درمیان جنگ بندی معاہدے پر عمل درآمد جاری ہے؛ اس حوالے سے فلسطینی قیدیوں کے متعلق امور کی کمیٹی نے اعلان کیا ہے کہ قیدیوں کے تبادلہ معاہدہ کے تحت آج مزید 183 فلسطینی قیدیوں کو رہا کیا جائے گا، جن میں عمر قید کی سزا پانے والے 18، جبکہ 54 سخت سزاؤں کے حامل اور 111 غزہ کے عام قیدی شامل ہیں۔
کمیٹی نے اپنے بیان میں مزید کہا ہے کہ فلسطینی مزاحمتی گروہوں نے تین صیہونی یرغمالیوں کی فہرست غاصب اسرائیلی حکام کے حوالے کردی ہے، جس کے بعد ہفتے کے روز عمر قید کی سزا پانے والے 18 فلسطینی قیدی اور 54 دیگر قیدی رہا کیے جائیں گے۔
واضح رہے قیدیوں کی فہرست میں وہ 111 فلسطینی عام قیدی بھی شامل ہیں جو 7 اکتوبر کو طوفان الاقصٰی کے بعد گرفتار کیے گئے تھے۔
القسام بریگیڈ کے ترجمان ابو عبیدہ نے اپنے پیغام میں کہا ہے کہ تنظیم نے قیدیوں کے تبادلے کے معاہدے کے تحت تین صیہونی قیدیوں کو بھی رہا کرنے کا فیصلہ کیا ہے۔
آپ کا تبصرہ