حوزہ نیوز ایجنسی کے مطابق، دفتر قائد ملت جعفریہ قم المقدسہ کے مدیر علامہ بشارت حسین زاہدی نے قائد ملت جعفریہ پاکستان کی خصوصی ہدایت پر آج مجمع جہانی اہل بیت قم میں ایک اعلیٰ وفد کے ہمراہ حجۃ الاسلام و المسلمین رمضانی سے ملاقات کی۔
اس ملاقات میں علامہ بشارت حسین زاہدی نے نمائندہ ولی فقیہ، قائد ملت جعفریہ پاکستان حضرت علامہ ساجد علی نقوی کی جانب سے حجۃ الاسلام رمضانی کو خصوصی سلام پیش کیا اور دفتر قائد ملت جعفریہ قم کی جانب سے مجمع جہانی اہل بیت کے ساتھ تبلیغی، ثقافتی اور تحقیقی امور میں بھرپور تعاون کی یقین دہانی کرائی۔
حجۃ الاسلام رمضانی نے اپنے گفتگو میں قائد ملت جعفریہ علامہ ساجد علی نقوی کا خصوصی شکریہ ادا کیا اور ان کی خدمات کو سراہا۔
انہوں نے پاکستان کے تمام مسلمانوں کا شکریہ ادا کرتے ہوئے کہا: پاکستان نے 12روزہ ایران اسرائیل جنگ میں ایران کا جس طرح ساتھ دیا وہ ایک بہترین ہمسایہ ہونے کا ثبوت ہے۔ انہوں نے امید ظاہر کی کہ یہ اتحاد و یکجہتی مستقبل میں بھی برقرار رہے گی۔
حجۃ الاسلام رمضانی نے واضح کیا کہ ایران، اسرائیل اور امریکہ کی دشمنی کوئی نئی بات نہیں بلکہ یہ دشمنی ایران میں انقلاب اسلامی کی آمد کے ساتھ ہی شروع ہو گئی تھی۔ انہوں نے تاکید کی کہ دشمن کو شکست دینے کے لیے امت مسلمہ کا اتحاد ناگزیر ہے۔
قابل ذکر ہے کہ وفد میں حجت الاسلام شیخ غلام محمد شاکری (مسؤل دفتر قائد)، حجت الاسلام سید حسین شاہ نقوی (مسؤل ارتباطات دفتر)، برادر محترم سید ناصر عباس نقوی انقلابی (مسؤل شعبہ زائرین ایران، عراق، شام) اور برادر محترم مولانا محمد علی حافظ بھی شامل تھے۔
آپ کا تبصرہ