حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے اعلیٰ سطحی وفد کے ہمراہ جمہوریہ اسلامی ایران کے پاکستان میں سفیر ڈاکٹر رضا امیری مقدم سے ملاقات کی۔
قائد ملت جعفریہ کے ہمراہ وفد میں شیعہ علما کونسل پاکستان کے مرکزی نائب صدور علامہ محمد رمضان توقیر، علامہ عارف حسین واحدی، مرکزی سیکرٹری جنرل علامہ ڈاکٹر شبیر حسن میثمی اور مرکزی سیکرٹری اطلاعات زاہد علی آخونزادہ شامل تھے۔
ملاقات میں سفیر محترم نے جمہوریہ اسلامی ایران میں امن و امان کے حوالے سے قائد محترم کو تازہ صورتحال سے آگاہ کیا اور موجودہ صورتحال کو پرامن قرار دیا اور ایران کے بیرونی خطرات سے بھی مکمل تیاری کے ساتھ نبرد آزما ہونے کے لیے آمادہ ہونے کے عزم کا اعادہ کیا۔
قائد ملت جعفریہ نے رہبر معظم حضرت آیت اللہ العظمی سید علی خامنہ ای دام ظلہ العالی کی صحت و سلامتی سمیت انقلاب اسلامی ایران اور ایرانی عوام کے تحفظ کی دعا کرتے ہوئے کہا: مشکل کی ہر گھڑی میں برادر اسلامی ملک ایران اور پاکستان کی عوام ایک دوسرے کے شانہ بشانہ کھڑی ہے۔
ایرانی سفیر ڈاکٹر رضا امیری مقدم نے بھی قائد ملت جعفریہ پاکستان حضرت علامہ سید ساجد علی نقوی اور ان کے وفد کی آمد کا شکریہ ادا کیا اور کراچی گل پلازہ کے آتشزدگی اور اس میں انسانی جانوں کے ضیاع کے واقعہ پر بھی رنج و غم کا اظہار کیا۔
آپ کا تبصرہ