حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے ختمی مرتبت، محبوب خدا، پیغمبر اکرم اور امام ششم حضرت امام جعفر صادق ؑ کے میلا د مسعود اور ہفتہ وحدت کے موقع پر امت مسلمہ کو ہدیہ تبریک پیش کرتے ہوئے کہا: قرآن کریم کی تعلیمات کے مطابق یہ امت، امت واحدہ ہے اور پیغمبر گرامی صلی اللہ علیہ وآلہ وسلم کی ذات بابرکت وحدت و اخوت اور بھائی چارے و یگانگت کا مرکز و محور ہے اور ان کی حیات طیبہ اور سیرت و کردار ہم سے یہ تقاضا کرتا ہے کہ جب ہمارا پختہ یقین ہے کہ ہم سب کا ایک خدا، ایک رسول، ایک قرآن اورایک کعبہ پر ایمان ہے تو فروعی نوعیت کے اختلافات کا حل مہذب انداز میں، شائستگی کے ساتھ علمی سطح پر ڈھونڈنے کی عادت ڈالنی چاہیے۔
انہوں نے کہا: ہمارے اسی موقف کی تائید ہمارے بزرگان دین، مراجع کرام اور آیات عظام نے بھی کی اور واضح کیا ہے کہ تمام مکاتب اور مسالک کے مقدسات کی توہین ممنوع ہے۔
علامہ ساجد نقوی نے مزید کہا: آل پیغمبر اکرم (ص) میں سے امام جعفر صادق علیہ السلام نے جس طرح اپنے جد امجد کی سیرت و کردار پر عمل پیرا ہوکر علم کے تمام شعبوں میں امت مسلمہ کی رہبری و رہنمائی کی وہ تاریخ اسلام کا ایک روشن باب ہے لہٰذ ا امت واحدہ کےلئے قرآنی تصور کو عملی طور پر اجاگر کرنے کےلئے تعلیمات قرانی، سیرت رسول اکرم اور سیرت امام جعفر صادق علیہ السلام سے ہمیں یہ درس ملتا ہے کہ ہم فرقہ وارانہ ہم آہنگی کے فروغ، مشترکات پر عمل درآمد، باہمی اتحاد و وحدت کی ضرورت، اسلامی دنیا اور استعماری سازشوں کو ناکام بنانے میں اپنا کردار ادا کریں اور پیغمبر اکرم صلی اللہ علیہ وآلہ وسلم کی تعلیمات کی روشنی میں جدید تقاضوں کو مد نظر رکھ کر عادلانہ نظام کی تشکیل و نفاذ کو یقینی بنائیں۔
آپ کا تبصرہ