حوزه نیوز ایجنسی کے مطابق، مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے 11 ستمبر، یوم وفات قائداعظم محمد علی جناحؒ کے موقع پر جاری اپنے پیغام میں کہا: برصغیر پاک و ہند میں قائد اعظم محمد علی جناح ؒ کی تحریک نے مسلمانوں کو پاکستان جیسے تحفے سے نوازا۔ یہ ملک جس کی بنیاد "لا الہ الا للہ" پر ہوئی تمام مسلمانوں کی مشترکہ جدوجہد سے وجود میں آیا۔
انہوں نے کہا: ہمیں اللہ پاک کا شکر ادا کرنا چاہیئے کہ اللہ تعالیٰ نے ہمیں قائداعظم محمد علی جناحؒ جیسا لیڈر عطا کیا جس نے ہم کو آزاد ریاست بنا کر دی۔ علامہ ڈاکٹر محمد اقبال ؒ کی فکر اور قائد اعظمؒ کی جدوجہد سے مغربی دنیا آج بھی پاکستان سے خوفزدہ ہے۔
علامہ شبیر حسن میثمی نے کہا: عالمی دنیا اس وقت مشکل مراحل سے گزر رہی ہے، ان مشکلات کی وجہ ایک شیطانی اور غاصب صیہونی ریاست ہے۔ قائد اعظم محمد علی جناحؒ کی دور اندیش سوچ اور فکر کا آج ہر فرد معترف ہے کہ انہوں نے اس غاصب ریاست کے حوالے سے جو فرمایا تھا آج بھی تاریخ ان الفاظ کو یاد کرتی ہے کہ "اسرائیل ایک ناجائز ریاست ہے، اس کو اُمت کے قلب میں گھسایا گیا ہے جس کو پاکستان کبھی تسلیم نہیں کرے گا"۔ اس دور اندیشی سے ثابت ہوتا ہے کہ قائد اعظمؒ دنیا عالم کی ایک عظیم اور دور اندیش شخصیت تھے۔
انہوں نے مزید کہا: موجودہ پاکستانی حالات اور مسائل چاہے اندرونی ہوں یا بیرونی ہم قائداعظمؒ کی سوچ اور ان کی طرز سیاست سے حل کرنے کی کوشش کریں۔ جنہوں نے ملک کے اندر تمام طبقات بالخصوص مذہبی آزادی جیسی باتوں کا کھلم کھلا اعلان کر کے اس بات کو واضح اور روشن کیا کہ کسی کی بھی مذہبی آزادی پر پابندی لگانا قانونی و آئینی جرم ہے۔
مرکزی سیکرٹری جنرل شیعہ علماء کونسل پاکستان نے کہا: قائداعظم محمد علی جناح ؒ کے افکار کی روشنی میں قوم کو متحد ہو کے ملک سے لاقانونیت، غربت و افلاس، تنگدستی و دیگرمسائل و مشکلات کا خاتمہ کرنا ہوگا۔ بانی پاکستان کے فرامین "اتحاد، تنظیم اور یقین محکم" پر عمل پیرا ہو کر وطن عزیز کو ترقی و خوشحالی کی راہ پر گامزن کیا جا سکتا ہے۔
آپ کا تبصرہ