بانیٔ پاکستان کے فرامین پر عمل پیرا ہو کر ہی وطن عزیز کو ترقی و خوشحالی کی راہ پر گامزن کیا جا سکتا ہے

حوزہ نیوز ایجنسی کی رپورٹ کے مطابق، مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے 25 دسمبر، یوم ولادت قائداعظم محمد جناحؒ کے موقع پر جاری اپنے پیغام میں کہا: برصغیر پاک و ہند میں قائداعظم محمد علی جناح ؒ کی تحریک نے مسلمانوں کو پاکستان جیسے تحفے سے نوازا۔ یہ ملک جس کی بنیاد "لا الہ الا للہ" پر ہوئی تمام مسلمانوں کی مشترکہ جدوجہد سے وجود میں آیا۔

انہوں نے مزید کہا: ہمیں اللہ پاک کا شکر ادا کرنا چاہیئے کہ اللہ تعالیٰ نے ہمیں قائداعظم محمد علی جناحؒ جیسا لیڈر عطا کیا جس نے ہمیں آزاد ریاست بنا کر دی۔

علامہ شبیر حسن میثمی نے کہا: علامہ ڈاکٹر محمد اقبال ؒ کی فکر اور قائداعظمؒ محمد علی جناح کی جدوجہد سے مغربی دنیا آج بھی پاکستان سے خوفزدہ ہے۔

انہوں نے مزید کہا: عالمی دنیا اس وقت مشکل مراحل سے گذر رہی ہے، ان مشکلات کی ایک بڑی وجہ شیطان اور غاصب صیہونی ریاست ہے۔ قائداعظم محمد علی جناحؒ کی دور اندیش سوچ اور فکر کا آج ہر فرد معترف ہے کہ انہوں نے اس غاصب ریاست کے حوالے سے جو فرمایا تھا اور آج بھی تاریخ ان الفاظ کو یاد کرتی ہے کہ "اسرائیل ناجائز ریاست ہے اس کو اُمت کے قلب میں گھسایا گیا ہے جس کو پاکستان کبھی تسلیم نہیں کرے گا"۔ اس دور اندیشی سے ثابت ہوتا ہے کہ قائد اعظمؒ دنیائے عالم کی ایک عظیم اور دور اندیش شخصیت تھے۔

مرکزی سیکرٹری جنرل شیعہ علماء کونسل نے کہا: قائداعظم محمد علی جناح ؒ کے افکار کی روشنی میں قوم کو متحد ہو کر ملک سے لاقانونیت، غربت و افلاس تنگدستی و دیگر مسائل و مشکلات کا خاتمہ کرنا ہو گا۔ بانی پاکستان کے فرامین اتحاد، تنظیم اور یقین محکم پر عمل پیرا ہو کر وطن عزیز کو ترقی و خوشحالی کی راہ پر گامزن کیا جا سکتا ہے۔