حوزہ نیوز ایجنسی کی رپورٹ کے مطابق، ترکی کی سرکاری مذہبی تنظیم "دیانت" نے حضرت محمد مصطفیٰ (ص) کی ولادت کے ڈیڑھ ہزار سال مکمل ہونے کی مناسبت سے انیمیشن فلم "پیامبر رحمت 571" تیار کی ہے، جو عنقریب سینما گھروں میں نمائش کے لیے پیش کی جائے گی۔
رپورٹ کے مطابق، صدرِ دیانت ترکی پروفیسر علی ارباش نے ترک نشریاتی چینل NSosyal سے گفتگو میں کہا کہ یہ فلم نبی اکرم (ص) کی سیرت، اخلاق اور حق کے راستے میں آپ کی جدوجہد کو نہایت پُراثر اور قابل فہم انداز میں پیش کرے گی، جو آنے والی نسلوں کے لیے ایک پائیدار اور قیمتی میراث ثابت ہوگی۔
انہوں نے مزید کہا کہ: "پیامبر رحمت 571 پہلی بار ترکی میں اس نوعیت کی انیمیشن کے طور پر سامنے آ رہی ہے اور ان شاء اللہ عالمی سطح پر بھی ایک نمایاں اور رہنمائی کرنے والا کام ثابت ہوگی۔ پروردگار سے دعا ہے کہ یہ اقدام خیر و برکت کا سبب بنے اور ہمیں ان بندگان میں شامل کرے جو نبی کریم (ص) کے اخلاق سے آراستہ ہوں اور ان کے راستے سے جدا نہ ہوں۔"
واضح رہے کہ فلم کے عنوان میں "571" کا مطلب وہی سال ہے جس میں پیغمبر اسلام حضرت محمد مصطفیٰ (ص) کی ولادت ہوئی تھی۔
آپ کا تبصرہ