حوزہ نیوز ایجنسی کی رپورٹ کے مطابق، مجلس خبرگانِ رہبری کے نائب صدر آیت اللہ سید ہاشم حسینی بوشہری نے آیت اللہ العظمیٰ امام خامنہ ای کی شہادت پر تعزیت پیش کرتے ہوئے اسلامی انقلاب کے نئے رہبر کے انتخاب کے عمل کے بارے میں جاری ایک پیغام میں کہا: عوام اس بات کا اطمینان رکھیں کہ مجلس خبرگانِ رہبری بہت جلد جمہوریہ اسلامی کے تیسرے رہبر کے انتخاب اور تعارف کے عمل کی حتمی رپورٹ سرکاری ذریعہ یعنی مجلس خبرگان کے سیکریٹریٹ کے ذریعے عوام تک پہنچا دے گی بشرطیکہ انقلابی عوام صبر کا مظاہرہ کریں اور ملک کے حالات کو مدنظر رکھیں۔
نائب صدر مجلس خبرگانِ رہبری کے پیغام کا خلاصہ درج ذیل ہے:
بسم اللہ الرحمن الرحیم
ایران کی مقاوم اور آزاد قوم کو سلام اور خراجِ تحسین پیش کرتے ہوئے، رہبرِ عظیم الشان آیت اللہ العظمیٰ امام خامنہ ای کی شہادت اور ان کے وصال پر گہری تعزیت پیش کی جاتی ہے۔
ایران کے معزز عوام کو اطلاع دی جاتی ہے کہ رہبرِ انقلاب کی شہادت کی خبر کے بعد، دشمن امریکہ اور صہیونی طاقتوں کی مسلط کردہ جنگ اور اس مجلس کو دی گئی براہِ راست دھمکیوں کے باوجود، مجلس خبرگانِ رہبری نے فوراً بورڈ آف ڈائریکٹرز کا اجلاس منعقد کیا اور نئے رہبر کے انتخاب کے عمل کے لیے ضروری اقدامات شروع کر دیے۔ اسی مقصد کے لیے ملک کے مختلف حصوں سے مجلس کے اراکین کو طلب کیا گیا تاکہ وہ اپنے شرعی اور قانونی فریضے کو انجام دے سکیں اور اس معاملے میں ایک لمحہ بھی تاخیر مناسب نہیں سمجھی گئی۔
اگرچہ ایران کے باشعور عوام اس حقیقت سے آگاہ ہیں کہ مجلس خبرگانِ رہبری کی خاص اہمیت کے پیش نظر موجودہ جنگی اور سکیورٹی حالات کو نظر انداز نہیں کیا جا سکتا لیکن خوش آئند بات یہ ہے کہ آئینِ ایران نے اس حوالے سے ضروری پیش بندی کر رکھی ہے۔ مجلس خبرگان کو آئین کے آرٹیکل 108 کے تحت اپنے فرائض سے متعلق قواعد بنانے کا اختیار حاصل ہے اور اس وقت ملک کا نظام آئین کے آرٹیکل 111 کے مطابق چلایا جا رہا ہے۔
امید ہے کہ اس عبوری مدت میں، جب تک نئے رہبر کا تعین اور اعلان نہیں ہو جاتا، عبوری کونسل اپنی ذمہ داریوں کو قوم کے سامنے احسن طریقے سے ادا کرے گی اور عوام کو روشن مستقبل کی امید دلائے گی۔
آخر میں ایک بار پھر تاکید کی جاتی ہے کہ عوام مطمئن رہیں کہ مجلس خبرگانِ رہبری بہت جلد جمہوریہ اسلامی کے تیسرے رہبر کے انتخاب اور تعارف کے عمل کی حتمی رپورٹ سرکاری چینل یعنی مجلس خبرگان کے سیکریٹریٹ کے ذریعہ عوام کو بتا دے گی۔ تاہم انقلابی عوام سے توقع کی جاتی ہے کہ وہ صبر کا مظاہرہ کریں اور ملک کے حالات کو پیش نظر رکھیں۔
سید ہاشم حسینی بوشہری
نائب صدر اور سربراہ سیکریٹریٹ مجلس خبرگانِ رہبری
آپ کا تبصرہ