حوزہ نیوز ایجنسی کی رپورٹ کے مطابق، ایران کے وزیر خارجہ سید عباس عراقچی نے ہندوستان کے دارالحکومت نئی دہلی میں پریس کانفرنس کرتے ہوئے کہا کہ ایران کسی بھی قسم کے دباؤ یا خطرے کے آگے سر تسلیم خم نہیں کرے گا۔ انہوں نے کہا کہ ہم فی الحال جنگ بندی کی صورتحال میں ہیں، اگرچہ یہ انتہائی نازک ہے، پھر بھی ہم سفارت کاری کو ایک بار پھر موقع دینے کے لیے اسے برقرار رکھنے کی کوشش کر رہے ہیں۔ ان کا کہنا تھا کہ فوجی حل ممکن نہیں اور مذاکرات و سفارت کاری ہی واحد جیت والا حل ہے۔
عراقچی نے کہا کہ گزشتہ 40 سال سے زائد عرصے سے ایران امریکی سخت پابندیوں کا نشانہ رہا ہے، لیکن یہ پابندیاں ایران کے عزم یا پالیسیوں کو تبدیل کرنے میں ناکام رہی ہیں۔ انہوں نے مزید کہا کہ ہم کسی بھی طرح سے امریکیوں پر بھروسہ نہیں کر سکتے، اسی لیے کسی بھی معاہدے سے پہلے ہر چیز مکمل طور پر واضح اور طے شدہ ہونی چاہیے۔
ایرانی وزیر خارجہ نے خبردار کیا کہ کچھ تخریبی عناصر سفارت کاری کو پٹڑی سے اتارنے کی کوشش کر رہے ہیں، اور کچھ جنگجو امریکہ کو ایک اور جنگ میں گھسیٹنا چاہتے ہیں۔ انہوں نے امید ظاہر کی کہ امریکہ یہ غلطی نہیں کرے گا، اور بالآخر سفارت کاری ہی غالب آئے گی۔
عراقچی نے کہا کہ ایران کا جوہری پروگرام مکمل طور پر پرامن مقاصد کے لیے ہے، اور ہم ہمیشہ اس بات کی یقین دہانی فراہم کرنے کے لیے تیار رہے ہیں کہ یہ پرامن ہے اور پرامن ہی رہے گا۔ انہوں نے کہا کہ ایران ان لوگوں کی مدد کے لیے تیار ہے جو ایران کی شرائط قبول کریں اور آبنائے ہرمز میں بحفاظت گزرنے کو یقینی بنائیں۔ ان کا کہنا تھا کہ ایک بار جارحیت ختم ہو جائے تو مجھے یقین ہے کہ سب کچھ معمول پر آجائے گا۔
آپ کا تبصرہ