حوزہ نیوز ایجنسی کی رپورٹ کے مطابق، حوزہ علمیہ کے استاد آیت اللہ محمد علی جاودان نے تہران کے حسینیہ آیت اللہ مرتضیٰ زاہد میں خطاب کرتے ہوئے نماز، تقویٰ اور اخلاقی تربیت کی اہمیت بیان کی۔ انہوں نے کہا کہ مؤمن کو اپنے اقوال، اعمال اور رویّوں کی نگرانی کرنی چاہیے اور بے فائدہ باتوں اور کاموں سے پرہیز کرنا چاہیے۔
انہوں نے حضرت فاطمہ زہرا سلام اللہ علیہا کی سخاوت کا واقعہ بیان کرتے ہوئے کہا کہ آپ نے اپنی شادی کی رات نیا لباس ایک ضرورت مند کو دے دیا تھا۔ آپ نے یہ عمل رسول اکرم صلی اللہ علیہ وآلہ وسلم کی تعلیمات کے مطابق انجام دیا، جن سے آپ نے سیکھا تھا کہ خدا کی راہ میں خرچ کرتے وقت اپنی پسندیدہ اور بہترین چیز پیش کرنی چاہیے، نہ کہ وہ چیز جس کی خود ضرورت نہ ہو۔
آیت اللہ جاودان نے کہا کہ حضرت زہرا سلام اللہ علیہا کا یہ عمل ہمیں دوسروں کے لیے بھی وہی پسند کرنے کی تعلیم دیتا ہے جو ہم اپنے لیے پسند کرتے ہیں۔ انہوں نے رسول اکرم صلی اللہ علیہ وآلہ وسلم کے نزدیک آپ کے مقام اور آپ کی رضایت و نا رضایتی کی اہمیت کی طرف بھی اشارہ کیا۔
انہوں نے حضرت علی علیہ السلام کی مظلومیت، رسول اکرم صلی اللہ علیہ وآلہ وسلم کی رحلت کے بعد پیش آنے والے واقعات اور حضرت زہرا سلام اللہ علیہا پر ڈھائے گئے مصائب کا ذکر کرتے ہوئے کہا کہ آپ کی زندگی سادگی، قناعت، صبر، ایثار اور حق پر ثابت قدم رہنے کا درس دیتی ہے۔ مؤمنین کو چاہیے کہ وہ ان تعلیمات کو اپنی انفرادی اور اجتماعی زندگی میں اپنائیں۔
آپ کا تبصرہ