حوزہ نیوز ایجنسی کی رپورٹ کے مطابق، مرکزی سیکرٹری جنرل اسلامی تحریک پاکستان علامہ ڈاکٹر شبیر حسن میثمی نے برسی شہید ضاءُ الدین رضوی کے موقع پر کہا کہ علامہ شہید ضیاءُ الدین رضویؒ پاکستان کی وہ عظیم شخصیت تھی جنہوں نے اپنی زندگی کو وقف برائے قوم و ملت کر دیا۔ قومی پلیٹ فارم کو گلگت، بلتستان میں وہ جان دی جس کی وجہ سے آج تک کام تیزی سے جاری و ساری ہے۔
انہوں نے کہا: تعلیم، اقوام کی ترقی اور انحطاط کا دروازہ ہے۔ اگر قوم درست اور اعلی تعلیم کے زیور سے آراستہ ہوگی تو ترقی و پیشرفت اس کے قدم چومے گی اور اگر تعلیم کے نام پر اپنی اقدار و تہذیب اور قومی احساس ذمہ داری سے محروم ہوگئی تو یہی تعلیم کسی بھی قوم کے انحطاط کی جانب پہلا قدم ہوگا۔ سید ضیاء الدین رضوی شہید ہماری قوم کی وہ "بیدار شخصیت" ہیں جنہوں نے تعلیم کی اس اہمیت کا ادراک کرتے ہوئے تعلیم کا رخ درست سمت میں موڑنے کے لیے تحریک چلائی اور اس راہ میں اسیری سے لیکر شہادت تک کی تمام منازل یکے بعد دیگرے طے کرتے گئے۔
شہید کی شہادت اور شہید کی یاد آج بھی ہم سے یہی تقاضا کررہی ہے کہ اپنی اقدار، تہذیب اور قومی ذمہ داریوں کو سمجھیں اور تعلیم کو اپنے لیے ترقی و ارتقاء کا دروازہ قرار دیں اور حقیقی معنی میں "بیدار قوم" بنیں۔
