حوزہ نیوز ایجنسی کی رپورٹ کے مطابق، 25 فروری 2024ء کو طالبات کی حوصلہ افزائی کے لیے ہر سال کی طرح اس سال بھی فاطمیہ سکول اینڈ کالج مظفر آباد کشمیر پاکستان میں" جلسہ تقسیم انعامات و اسناد " کا انعقاد کیا گیا، جس میں نہ صرف ادارۂ ہذا کی طالبات بلکہ والدین اور اساتذہ سمیت دیگر علمی شخصیات نے شرکت کی۔
واضح رہے کہ فاطمیہ سکول ایک ایسا منفرد ادارہ ہے جس کا بنیادی مقصد تعلیم و تربیت کے حصول کو فروغ و رواج دینے کے ساتھ ساتھ بچیوں کو دینی و دنیوی تعلیم سے آشنا کروانا ہے، تاکہ بچیوں کی مثبت بنیادوں پر ذہن سازی کی جا سکے۔ اس ادارہ کا اولین مقصد اقامت دین بذریعہ تعلیم ہے، تاکہ اسوۂ حسنہ کی روشنی میں نئی نسل میں دینی و عصری تعلیم و ترقی کے شعور کو اجاگر کیا جائے۔
پروگرام کا آغاز تلاوت کلام پاک سے کیا گیا ۔مہمانان خصوصی نے طالبات کی حوصلہ افزائی کے لیے طالبات میں اسناد تقسیم کیں۔
پرنسپل آف فاطمیہ سکول اینڈ کالج محترمہ سیدہ فضہ مختار نقوی نے کہا کہ تعلیم کی اہمیت ہر دور میں انمول رہی ہے۔ تعلیم ہی وہ واحد ہتھیار ہے جس کے ذریعے سے تمام دینی و دنیوی مسائل کو حل کیا جا سکتا ہے۔
انہوں نے مزید کہا کہ قوموں کی ترقی اور کامیابی تعلیم و تربیت کے ذریعے سے ہی ممکن ہے ۔
مزید تصاویر دیکھیں:
فاطمیہ سکول اینڈ کالج مظفر آباد کشمیر پاکستان میں سالانہ تقریب تقسیم اسناد و انعامات
