حوزہ نیوز ایجنسی کی رپورٹ کے مطابق، جامعۃ المصطفٰی العالمیہ پاکستان کے شعبۂ ثقافت و تربیت کی جانب سے انقلابِ اسلامی ایران کی مناسبت سے مشہور کتاب " امام خمینی کی خاندانی سیرت و زندگی "کی کتاب خوانی کا مقابلہ منعقد کیا گیا، جس میں فاطمیہ ایجوکیشنل کمپلیکس مظفر آباد کشمیر کی طالبات نے بھرپور شرکت کی۔

مقابلۂ کتاب خوانی کا مقصد امام خمینی کی خاندانی سیرت و زندگی سے آگاہی حاصل کرنا، درس لینا اور زیادہ سے زیادہ علمی مقابلوں میں شرکت کرنا ہے، تاکہ طلباء و طالبات بڑھ چڑھ کر مقابلوں میں حصہ لے کر معلومات کا دائرہ وسیع کرنے کے اس موقع سے فائدہ اٹھا سکیں۔

اس علمی مقابلے میں فاطمیہ ایجوکیشنل کمپلیکس مظفر آباد کشمیر پاکستان کی طالبات کے ساتھ ساتھ سکول اور کالج کی طالبات نے بھی بھرپور شرکت کی۔

مقابلے میں کل 50 طالبات نے شرکت کی، مقابلے میں نمایاں کامیابی حاصل کرنے والی طالبات کو نقد و نفیس انعامات سے نوازا جائے گا۔