حوزہ نیوز ایجنسی کی رپورٹ کے مطابق، پندرہ شعبان المعظم ولادت باسعادت امام مہدی علیہ السلام کی مناسبت سے فاطمیہ ایجوکیشنل کمپلیکس میں اعمال نیمہ شعبان کا اہتمام کیا گیا، جس کا آغاز شب دو بجے کیا گیا اور پرنسپل آف فاطمیہ ایجوکیشنل کمپلیکس خانم فضہ مختار نقوی صاحبہ نے اعمال شب نیمہ شعبان کی تفصیل و فضیلت بیان کی اور اپنے خوبصورت انداز میں دعائے کمیل پڑھی۔
پندرہویں شعبان کی رات شب برات کے نام سے مشہور ہے ۔اس شب کو شب برات اس لئے کہتے ہیں، کیونکہ اس رات میں خدا بنو کلب کی بکریوں کے بالوں کی تعداد کے برابر لوگوں کو جہنم کی آگ سے نجات دیتا ہے۔
شعبان کا مہینہ قرب الٰہی و رحمت خداوندی کا مہینہ ہے جس کے تمام گھنٹے، ایام ہر لحظہ اور مخصوصا نیمہ شعبان کی شب و روز مؤمنین اور امام مہدی علیہ السلام سے محبت کرنے والوں کے لئے استفادہ کا وقت ہے۔
تفصیلات کے مطابق، اعمال کا اختتام زیارت امام حسین علیہ السلام سے کیا گیا اور دعا کی درخواست کی گئی کہ آج کی شب میں خلوص نیت اور ٹوٹے ہوئے دل کے ساتھ خدا کو آئمہ اطہار اور خصوصاً امام مہدی علیہ السلام کا واسطہ دے کر اس دنیا سے ظلم و جور کے خاتمے اور امام کے ظہور کے لیے دعا کی جائے۔
تمام شرکائے محفل کے لئے فاطمیہ ایجوکیشنل کمپلیکس مظفرآباد آزاد کشمیر پاکستان کی جانب سے سحری کا اہتمام کیا گیا۔
آخر میں نماز فجر کی ادائیگی، سلام آخر اور دعائے امام زمانہ سے محفل کا اختتام کیا گیا۔
