حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے چالیس سے زائد مرتبہ غزہ جنگ بندی کی قراداد کو سلامتی کونسل میں ویٹو کرنے پر ردعمل اور پاکستان میں سامراج کی نام نہاد "امن"پالیسی کی ستائش پر تبصرہ کرتے ہوئے کہا: ایک مرتبہ پھر ثابت ہوگیا کہ ناجائز صہیونی ریاست کے دوام کےلئے چاہے آخری فلسطینی تک اس ظلم کی بھینٹ چڑ ھ جائے، سامراج اس کی پشت پناہی کیساتھ اس کا تحفظ جاری رکھے گا۔
انہوں نے کہا: پوری دنیا ان مظالم پر چیخ اٹھی مگر سامراج اور اس کے حواری ٹس سے مس نہ ہوئے ، ایسے بیانات اور اقدامات سے گریز کیا جائے جو صہیونیت کو مزید شہ دیں اور غز ہ و فلسطین کے مظلوموں کے زخموں پر نمک پاشی کے مترادف ہوں ۔
علامہ سید ساجد علی نقوی نے کہا: غزہ، مقبوضہ بیت المقدس ، راملہ، مغربی کنارہ سمیت فلسطین کے چپے چپے پر کون سا ظلم، کون سی قیامت اور ایسی سفاکیت ہے جو برپا نہ کی گئی ہو، بچے کھچے فلسطینی مظلوموں کےلئے جنگ بندی کی ایک اور قرارداد سلامتی کونسل میں پیش کی گئی مگر افسوس ایک مرتبہ پھر سامراج اسی طرح اس قرارداد پر چڑھ دوڑا جیسا اسرائیلی ریاست مظلو م نہتے فلسطینیوں پر ٹینکوں، بارود اور جنگی جہازوں کے ذریعے چڑھ دوڑی ۔
انہوں نے مزید کہا: اس سے یہ بات روز روشن کی طرح واضح اور ہمارا موقف ایک مرتبہ پھر مزید تقویت کے ساتھ سامنے آگیا کہ فلسطین میں جاری ظلم کے پیچھے اصل ہاتھ یہی ظالم سامراج ہے اور اسی کی پشت پناہی میں ظلم کی داستانیں رقم کی جارہی ہیں مگر افسوس پاکستان میں سامراج کی پالیسیوں کی تائیدوستائش کی جارہی ہے لہٰذا ایسے تمام بیانات اور اقدامات سے گریز کیا جائے کیونکہ سامراج کی ستائش بارے بیان و اقدام مسئلہ فلسطین سے میل نہیں کھاتے اور انہیں کسی صورت قوم و ملت تسلیم نہیں کرے گی۔
آپ کا تبصرہ