حوزہ نیوز ایجنسی کی رپورٹ کے مطابق، ایم ڈبلیو ایم کے سیکرٹری جنرل سید ناصر شیرازی نے نو محرم الحرام کے جلوس کے دوران اسلام آباد میں عزاداری پر غیر قانونی قدغن کے خلاف پریس کانفرنس کرتے ہوئے کہا کہ اس وقت پوری انسانیت محسن انسانیت امام حسین علیہ السّلام کے غم میں غمگین ہیں۔
انہوں نے مزید کہا کہ ایام عاشور ہمیں بتاتے ہیں کہ کیسے قلت اکثریت پر غالب آتی ہے۔ امام عالی مقام نے جیسے فرمایا تھا کہ مجھ جیسا یزید جیسے کی بیعت نہیں کرسکتا، یہی رہنما اصول ہے۔
ایم ڈبلیو ایم کے سیکرٹری جنرل نے غزہ میں جاری مظالم پر تشویش کا اظہار کرتے ہوئے کہا کہ جس طرح غزہ میں ظلم و جبر کیا گیا وہ موجودہ دور کی یزیدیت ہے۔ اس دور کی یزیدی طاقتوں کو حسینی فکر نے پھر چیلنج کیا اور سرخرو ہوئے۔
انہوں نے مزید کہا کہ آج امریکہ و اسرائیل پوری دنیا میں بدی اور نفرت کی تصویر بن گئے ہیں اور انہوں نے ایران پر جس طرح حملہ کیا، جس کا جواب کربلائے معلی کے ماننے والوں نے دیکر دنیا کو حیران کیا۔
ناصر شیرازی نے مزید کہا کہ تنہا ایران نے کربلائی جدوجہد کے ساتھ امریکی و اسرائیلی طاقتوں کو ناکام بنایا۔
انہوں نے مزید کہا کہ آج پوری دنیا میں امام عالی مقام کے ساتھ اپنی دلی وابستگی کے لیے لوگ غم منا رہے ہیں۔
ایم ڈبلیو ایم کے مرکزی سیکرٹری جنرل نے عزاداری پر غیر قانونی پابندی پر شدید ردعمل کا مظاہرہ کرتے ہوئے کہا کہ افسوس مجالسِ عزاء پر پابندیاں لگائی جارہی ہیں اور بے جا دباؤ بڑھانے کی کوشش کی جارہی ہے۔
انہوں نے مزید کہا کہ آج جس طرح لوگ اسلام آباد میں عاشوراء کے لیے نکل رہے ہیں اسی طرح اربعین کے لیے نکلیں گے۔ ہم کسی قسم کی پابندی کو کبھی قبول نہیں کریں گے۔
ناصر شیرازی نے واضح کیا کہ افسوس سیاسی جلسوں یا کسی نجی محفل پر کوئی پابندی نہیں مگر غم حسین پر پابندی ؟ یہ کبھی قبول نہیں کریں گے۔
آپ کا تبصرہ