حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے مادر ملت محترمہ فاطمہ جناح کی برسی کے موقع پر اپنے بیان میں کہا: قومو ں کی ترقی میں ہمیشہ خواتین کا مرکزی کردار رہاہے، جدوجہد پاکستان میں محترمہ فاطمہ جناح وہ شخصیت ہیں جو نہ صرف بابائے قوم کے شانہ بشانہ رہیں بلکہ انتہائی مشکل ترین حالات میں بھائی کا ساتھ دے کر برصغیر میں پاکستان کے قیام میں اپنا ناقابل فراموش کردار ادا کیا اور بعد ازاں مشکل ترین حالات کے باوجود جمہوری ، اسلامی ، فلاحی ریاست کے قیام کی خاطر آخری دم تک جدوجہد کرتی رہیں، آئین کی بالادستی،جمہوریت کی مضبوطی کیلئے ان کا نمایاںکردار ہمیشہ یاد رکھا جائیگا۔
انہوں نے کہا: محترمہ فاطمہ جناح روز اول سے بانی پاکستان کے شانہ بشانہ کھڑی رہیں اور قیام پاکستان میں اپنا بھرپور کردار ادا کیا اور مشکل حالات کے باوجود اپنے بھائی کا ساتھ چھوڑا نہ ہی ان کے نظریات سے انحراف کیا۔ قائد کی رحلت کے بعد بھی بہت سی مشکلیں آئیں مگر وہ اپنے موقف پر ڈٹی رہیں اور اپنے آخری ایام تک ان پر کاربند رہیں۔
قائد ملت جعفریہ نے کہا: وہ مادر ملت کے ساتھ مادر جمہوریت کہلانے کی بھی حقدار ہیں کیونکہ جس طرح انہوں نے آئین کی بالادستی کے ساتھ جمہوریت کی مضبوطی کیلئے اپنا کردار ادا کیا وہ ناقابل فراموش ہے۔
انہوں نے کہا: پوری قوم کو محترمہ کے افکار اور ان کی جدوجہد سے سبق سیکھنا چاہیے، اسلام اور پاکستان کی تاریخ میں خواتین کا ایک بڑا کردار رہا ہے جبکہ قوموں کی ترقی و خوشحالی میں بھی خواتین نے ہمیشہ مرکزی کردار ادا کیا ہے۔ پوری قوم کو بھی چاہیے کہ وہ ملک و قوم کی خدمت کیلئے ان کے کردار سے استفادہ کریں۔
علامہ سید ساجد علی نقوی نے آخر میں کہا: مادر ملت کی عظیم جدوجہد اور قربانیوں کو ہمیشہ یاد رکھا اور مشعل راہ سمجھا جائے گا۔
آپ کا تبصرہ