حوزہ نیوز ایجنسی کی رپورٹ کے مطابق، وائس چیئرمین مجلس وحدت مسلمین پاکستان علامہ سید احمد اقبال رضوی نے اپنے ایک بیان میں کہا ہے کہ محرم الحرام کے دوران عزاداروں پر قائم بے بنیاد اور بلا جواز مقدمات کو فوری منسوخ کیا جائے، عزاداری سید الشہداءؑ ہماری عبادت ہے اور اس پر کسی بھی قسم کی پابندی اور قدغن کو ہم کسی صورت قبول نہیں کریں گے۔
انہوں نے مزید کہا کہ پنجاب اور سندھ میں مجالسِ عزاء اور جلوس ہائے عزاء پر انتقامی اور متعصبانہ سوچ پر مبنی جھوٹے مقدمات قائم کیے گئے۔ مقدمات تکفیری عناصر کے اشارے پر درج کیے گئے ہیں اور پولیس نے بے گناہ عزاداروں کو بلاجواز حراساں کیا ہے۔
انہوں نے کہا کہ یہ اقدامات ناقابلِ برداشت اور آئینی و مذہبی آزادی کے خلاف ہیں، عزاداری ہمارا آئینی و بنیادی حق ہے اور ہم حکومتی ذمہ داران سے مطالبہ کرتے ہیں کہ عزاداروں پر قائم کیے گئے تمام بے بنیاد مقدمات کو فوری منسوخ کیا جائے، چکوال، لاہور، ملتان کی ضلعی انتظامیہ ان مقدمات کو فوری طور پر کالعدم قرار دے۔
آپ کا تبصرہ