حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے بلوچستان سے پنجاب آنیوالی مسافر بس پر ہونے والے ٹارگٹڈ حملے کی شدید الفاظ میں مذمت، جانی نقصان پرگہرے دکھ کا اظہار اور عوام کے جان و مال کے تحفظ کویقینی بنانے کیلئے مزید اقدامات کا مطالبہ کرتے ہوئے ملک میں حالیہ بارشوں میں ہونیوالے جانی ومالی نقصان پر بھی افسوس کا اظہار کیا اور حکمرانوں سے شہری دفاعی نظام کو موثر مربوط و فعال کرنے پر زور دیا۔
انہوں نے بلوچستان کے صوبائی دارالحکومت کوئٹہ سے پنجاب آنیوالی مسافر بس پر ہونے والے دہشت گردی کے حملے کی شدید الفاظ میں مذمت کرتے ہوئے کہا: شناختی کارڈ چیک کرکے مسافروں کی ٹارگٹ کلنگ انتہائی افسوسناک و تشویشناک پہلو ہے ، اس ٹارگٹ کلنگ کا نشانہ بننے والے مسافروں کے لواحقین سے بھی گہری ہمدردی و تعزیت کا اظہار کرتے ہیں۔
قائد ملت جعفریہ پاکستان نے حالیہ دنوں میں ہونیوالی بارشوں اور سیلابی ریلوں میں ہونیوالے جانی و مالی نقصان پر بھی گہرے دکھ کا اظہار کرتے ہوئے کہا: عوام کے جان و مال کے تحفظ کیلئے ایڈوائزری جاری کرنے ساتھ ساتھ پیشگی اقدامات بھی انتہائی لازم ہیں۔ خصوصاً ندی نالوں کی صفائی کے ساتھ قرب و جوار، شہری و دیہی نشیبی علاقوں میں حفاظتی انتظامات کو مزید بہتر اورحکومتی مشینری کو مزید فعال بنایا جائے، پانی کے قدرتی بہاؤ کے راستے میں مصنوعی رکاوٹیں اگر بروقت ختم کی جائیں اور اس حوالے سے پیشگی اقدامات اٹھائے جائیں تو بڑے جانی و مالی نقصان سے بچنا بھی ممکن ہے۔
علامہ سید ساجد علی نقوی نے غیر معمولی موسم کی صورتحال میں عوام کو بھی حفاظتی انتظامات کے ساتھ احتیاط کی تاکید بھی کی۔
آپ کا تبصرہ