حوزہ نیوز ایجنسی کی رپورٹ کے مطابق، جامعۃ المصطفٰی خاتم النبیین صلی اللہ علیہ وآلہ وسلم بلوچستان میں علامہ مقصود علی ڈومکی کی زیرِ صدارت معززین کا ایک اہم اجلاس منعقد ہوا۔ اجلاس میں حاجی شاہ مراد ڈومکی، احمد علی خان ٹالانی، رحم دل ٹالانی، ظفر علی ٹالانی حاجی داد محمد منصب علی ڈومکی مظفر علی زوار غلام مصطفیٰ استاد رفیق احمد و دیگر معززین نے شرکت کی۔
اجلاس سے خطاب کرتے ہوئے علامہ مقصود علی ڈومکی نے کہا کہ "شہر میں بڑھتی ہوئی موٹر سائیکل اور موبائل چھیننے کی وارداتیں، بھتہ وصولی کی پرچیاں اور جرائم میں اضافہ باعثِ تشویش ہے۔ امن و امان کے قیام کے لیے شہر کو سیف سٹی پروجیکٹ کے تحت خفیہ کیمروں سے لیس کیا جائے تاکہ شہریوں کو تحفظ فراہم ہو۔اور مجرموں کا تعاقب کیا جائے"
انہوں نے کہا کہ "جیکب آباد 12 لاکھ آبادی پر مشتمل ایک اہم ضلع ہے، جس کے اطراف میں بلوچستان اور سندھ کے کئی اضلاع واقع ہیں۔ یہاں کی قبائلی اور نیم شہری آبادی کی تعلیمی ضروریات کو مدنظر رکھتے ہوئے جیکب آباد میں فوری طور پر ایک یونیورسٹی کا قیام از حد ضروری ہے تاکہ یہاں کی خواتین اور نوجوان نسل کو تعلیم کے زیور سے آراستہ کیا جا سکے۔"
مزید برآں، بلوچستان میں پنجاب کے مسافروں کے قتل پر شدید غم و غصّے کا اظہار کرتے ہوئے علامہ مقصود علی ڈومکی نے کہا کہ"بے گناہ انسانوں کا قتل شرمناک اور ناقابلِ قبول ہے۔ قرآن کریم کے مطابق ایک انسان کا ناحق قتل پوری انسانیت کا قتل ہے۔ مسافروں کو شناختی کارڈ دیکھ کر قتل کرنا انسان دشمنی اور اسلام دشمنی ہے۔"
انہوں نے مطالبہ کیا کہ" بے گناہ مسافروں کے قتلِ میں ملوث عناصر کو بے نقاب کیا جائے اور انہیں قانون کے مطابق عبرتناک سزا دی جائے۔ حقوق کے حصول کی جدوجہد جمہوری انداز میں ہونی چاہیے، بے گناہ انسانوں کا قتل ہرگز جائز نہیں۔"
علامہ مقصود علی ڈومکی نے کہا کہ عاشور کے دن زخمیوں کے علاج اور عزاداروں کی خدمت کے لیے فری میڈیکل کیمپ کا انعقاد قابل تعریف عمل تھا۔ جس پر میں منصب علی ڈومکی اور ان کی ٹیم کو خراج تحسین پیش کرتا ہوں۔ خدمت و فلاح انسانیت کا یہ سفر اسی جذبے کے تحت جاری رہے گا۔
آپ کا تبصرہ