حوزہ نیوز ایجنسی کی رپورٹ کے مطابق، امیر جماعت اسلامی پاکستان حافظ نعیم الرحمٰن نے کراچی میں پریس کانفرنس سے خطاب کرتے ہوئے حکومت کو خبردار کیا ہے کہ اگر اسرائیل کو تسلیم کرنے یا ابراہم معاہدے کا حصہ بننے کی کوئی کوشش کی گئی تو قوم بھرپور مزاحمت کرے گی۔
انہوں نے کہا: پاکستان میں کچھ وزراء ایسے بیانات دے رہے ہیں جیسے وہ ابراہم معاہدے پر بات کرنے یا اسرائیل کو تسلیم کرنے اور اسے دو ریاستی حل کے طور پر آگے بڑھانے کی سوچ رکھتے ہوں۔
حافظ نعیم الرحمٰن نے مزید کہا: میں ان وزیروں اور پوری حکومت کو خبردار کرتا ہوں کہ جو بھی یہ تصور کرے گا کہ پاکستان میں ابراہم معاہدے میں شامل ہونے یا اسرائیل کو تسلیم کرنے کے لیے کوئی بات چیت شروع کی جا سکتی ہے تو پوری قوم اس کی مزاحمت کرے گی۔ چاہے وہ کوئی وزیرِاعظم ہو یا صدر، آرمی چیف ہو یا فیلڈ مارشل، سب کو سمجھ لینا چاہیے کہ یہ ہمارے لیے "ریڈ لائن" ہے۔
انہوں نے مزید کہا: ان کی جماعت کے لیے یہ اعزاز کی بات ہو گی کہ وہ ایسی کسی بھی کوشش کے خلاف مزاحمت کی قیادت کرے۔
امیر جماعت اسلامی پاکستان نے حکومت کو تنقید کا نشانہ بناتے ہوئے کہا: امریکا کی چاپلوسی بند کی جائے، وزیراعظم سے پوچھنا چاہتا ہوں جنہوں نے پاک بھارت جنگ بندی کے موقع پر ٹرمپ کی خدمت میں ٹوئیٹ کی تھی اور پھر انہیں نوبیل انعام کے لیے نامزد کرنے کی بات کی تھی، میں پوچھنا چاہتا ہوں وہ ثالثی کہاں گئی؟ ٹرمپ ہر چار روز بعد ایک بیان دیکر خاموش ہو جاتا ہے، اس پر بات کیوں نہیں ہو رہی؟۔
واضح رہے کہ معاہدہ ابراہمی کے تحت 2020ء میں مشرقِ وسطیٰ کے کچھ ممالک اسرائیل سے تعلقات معمول پر لے آئے تھے۔
آپ کا تبصرہ