حوزہ نیوز ایجنسی کی رپورٹ کے مطابق، امام جمعہ ممبئی حجت الاسلام و المسلمین مولانا سید احمد علی عابدی نے نمازِ جمعہ کے خطبوں میں مجالسِ عزاء اور عزاداری کی اہمیّت پر روشنی ڈالتے ہوئے کہا کہ ذکر حسین علیہ السّلام آخرت کا بہترین ذخیرہ ہے۔
مولانا سید احمد علی عابدی نے رسول اللہ صلی اللہ علیہ وآلہ وسلم کی ایک طویل حدیث بیان کرتے ہوئے کہا کہ غیبت، دنیا کی محبت، تکبّر، خود پسندی، حسد، بے رحمی اور عدم اخلاص عمل کی قبولیت میں رکاوٹ ہے۔
انہوں نے اخلاص کے سلسلے میں امام خمینی رحمۃ اللہ علیہ کے قول کو بیان کرتے ہوئے کہا کہ امام خمینی رحمۃ اللہ علیہ نے فرمایا: "جو عمل اللہ کے لیے نہیں ہوگا اس کی قبولیت کے لیے خدا سے مطالبہ عبث ہے۔" یاد رکھیں کہ ہم سب کو بے وقوف بنا سکتے ہیں، لیکن خدا کو نہیں۔
مولانا نے ایک روایت کے ذیل میں کہا کہ جو عمل اللہ کے لیے نہیں ہوتا ہے اللہ اسے قبول نہیں کرتا ہے۔
امام جمعہ ممبئی نے ذکر حسینؑ پر تاکید کرتے ہوئے کہا کہ امام حسین علیہ السلام کا ذکر اور ان کی عزاداری ہی واحد ذریعہ ہے جو ہمارے لیے بہترین ذخیرۂ آخرت ہے، لہٰذا کوشش کریں کہ خلوصِ دل سے امام حسین علیہ السلام کا تذکرہ کریں اور ان کی عزاداری کریں۔
آپ کا تبصرہ