حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے 28 صفر المظفر حضرت خاتم المرسلین کے یوم وصال اور نواسہ پیغمبر اکرم حضرت امام حسن ؑ کے یوم شہادت کے موقع پر جاری اپنے پیغام میں کہا: خاتم النبین، رحمت اللعالمین، سرور کائنات (ص) انسانیت کی ہدایت کا مرکز و محور ہیں اور قرآن حکیم کے ساتھ ساتھ رسول اکرم صلی اللہ علیہ وآلہ وسلم کی سنت اور سیرت کی شکل میں ایسا خزانہ امت مسلمہ کے لئے موجود ہے جو آپ کے وصال کے صدیوں بعد بھی عالم انسانیت کی مکمل رہنمائی کر رہا ہے اور انسانیت کو ہر میدان میں زندگی گزارنے کا طریقہ اور ترقی کا سلیقہ سکھا رہا ہے۔
انہوں نے مزید کہا: اگر امت مسلمہ بالخصوص اور عالم انسانیت بالعموم حضوراکرم صلی اللہ علیہ وآلہ وسلم کی، سنت اور سیرت پر عمل پیرا ہو تو خطہ ارض سے تمام مشکلات کا خاتمہ ہوسکتا ہے۔
علامہ سید ساجد نقوی نے کہا: امت مسلمہ کی نجات کے لئے وصال نبوی کے بعد اہل بیت اطہار علیہم السلام نے امت کی تمام معاملات میں رہنمائی کی۔ عالم انسانیت کے انفرادی اوراجتماعی مسائل کا حل اہل بیت علیہم السلام نے اپنے عمل و کردار سے پیش کیا۔
انہوں نے کہا: نواسۂ پیغمبر امام حسن مجتبی علیہ السلام اپنے جد امجد رسول خدا، والد امیر المومنین حضرت علی ؑ اور حضرت فاطمہ زہرا ؑ کی طرح اعلیٰ اخلاق و خصائل کا مجموعہ تھے۔ آپ اعلی اخلاقی اوصاف جن میں جودو سخا، جس کے سبب آپ کو کریم اہل بیت کے لقب سے پکارا جاتا تھا، لوگوں کی ضرورتوں کو پورا کرنا، مہربانی سے پیش آنا، صبر و تحمل، عفو و درگزر جس کے دشمن بھی معترف تھے، ان تمام اوصاف کا کامل نمونہ تھے۔
قائد ملت جعفریہ نے کہا: سیرت رسول اکرم صلی اللہ علیہ وآلہ وسلم کے عملی مشاہدہ اور سنت نبوی کی عملی تعبیر و تشریح کیلئے سیرت امام حسن ؑ کا مطالعہ و مشاہدہ کرنا ہوگا کیونکہ نبی اکرم، حضرت علی ؑ اور سیدہ فاطمہ زہراؑ نے حضرت امام حسن ؑ کی تربیت اس نہج پر کی کہ حضرت امام حسن ؑ ہر مرحلے، ہر میدان، ہر موڑ اور ہرانداز میں شبیہ پیغمبر نظر آئے۔
انہوں نے کہا: رسول خدا صلی اللہ علیہ وآلہ وسلم نے اپنی احادیث میں حضرت امام حسن ؑ کی شان و منزلت اور حیثیت و مرتبت کی نشاندہی فرمادی تھی۔ امام ؑ نے اپنے جد امجد کی سیرت پر عمل پیرا ہوتے ہوئے صلح کا راستہ اپناکر ثابت کردیاکہ اہل بیت پیغمبر دین اسلام کی نگہبانی کا فریضہ ادا کرنا جانتے ہیں۔
علامہ ساجد نقوی نے کہا: موجودہ پرفتن دور اور سنگین حالات میں ہمیں باہمی فروعی و جزوی اختلافات کو پس پشت ڈال کر اور سینکڑوں مشترکات کو سامنے رکھتے ہوئے پیغمبر اکرم اور خاندان رسالت کے اسوہ پر عمل پیرا ہو کر امن، محبت، رواداری، تحمل اور برداشت کا راستہ اختیار کرنا ہو گا اور علم و حلم، عقل و شعور، تدبر و تحمل اور اخوت و یگانگت کی راہ پر چل کر خداوند تعالی اور خاتم الانبیاء کی خوشنودی حاصل کرنا ہو گی۔ صرف اسی صورت میں دنیوی و اخروی نجات ممکن ہے۔
آپ کا تبصرہ