حوزہ نیوز ایجنسی کی رپورٹ کے مطابق، تقریب میں حجت الاسلام شیخ محمد اسحاق نجفی نے بطورِ مہمانِ خصوصی شرکت کی، جبکہ جامعۃ الکوثر اسلام آباد کے استاد، شیخ احمد حسین فخرالدین بھی خصوصی طور پر شریک ہوئے۔
تقریب کے دوران حفظِ قرآن کریم مکمل کرنے کے ساتھ ساتھ میٹرک کے امتحانات میں نمایاں کامیابی حاصل کرنے والی دو ہونہار طالبات کو خصوصی طور پر خراجِ تحسین پیش کیا گیا۔
طالبات کی شاندار تعلیمی و قرآنی کارکردگی کے اعتراف میں مہمانِ خصوصی کی جانب سے انہیں زیارتِ کربلا کے ٹکٹ بطورِ انعام دینے کا اعلان کیا گیا۔
اس موقع پر مقررین نے قرآن کریم کی تعلیم و حفظ کی اہمیت، دینی تعلیم کے ساتھ عصری تعلیم کے حصول اور طالبات کی علمی و اخلاقی تربیت کی ضرورت پر زور دیا۔
انہوں نے طالبات کو اپنی تعلیمی کامیابیوں کا سفر جاری رکھنے اور قرآن کریم کی تعلیمات کو اپنی عملی زندگی کا حصہ بنانے کی تلقین کی۔
محسنِ ملت آیت اللہ شیخ محسن علی نجفی نے قرآنِ کریم کی تعلیم و ترویج کے لیے جو علمی و تربیتی نظام قائم کیا، اس کے ذریعے نئی نسل کو قرآن کریم سے جوڑنے کا سلسلہ جاری ہے۔ طالبات کی حفظِ قرآن کے ساتھ تعلیمی میدان میں نمایاں کامیابی اسی قرآنی و تعلیمی مشن کی ایک خوبصورت مثال ہے۔
آخر میں دارالمودۃ حفظ اسکول کی انتظامیہ نے تقریب میں شرکت کرنے والے تمام معزز مہمانوں کا تہِ دل سے شکریہ ادا کیا۔
انتظامیہ نے بالخصوص شیخ محمد اسحاق نجفی اور شیخ احمد حسین فخرالدین کی خصوصی طور پر اسلام آباد سے تشریف آوری، دعاؤں، شفقت اور طالبات کی حوصلہ افزائی پر ان کا شکریہ ادا کرتے ہوئے کہا کہ معزز مہمانوں کی شرکت ادارے کے لیے باعثِ افتخار اور طالبات کے لیے حوصلہ افزائی کا باعث ہے۔
آپ کا تبصرہ