حوزہ نیوز ایجنسی کی رپورٹ کے مطابق، آیت اللہ حسین مظاہری نے شہر اصفہان میں معاشرے میں فراموش ہونے والی فضیلتوں کے موضوع پر اپنے درس اخلاق میں کہا: صداقت ایسی فضیلت ہے کہ جس کی پیغمبر اکرم (صلی اللہ علیہ وآلہ وسلم) اور ائمہ طاہرین (علیہم السلام) نے بہت زیادہ تاکید کی ہے اور امیر المومنین حضرت علی (علیہ السلام) کی حدیث کے مطابق "صداقت اہل دین کی علامت ہے"۔
انہوں نے کہا: صداقت کی چند قسمیں ہیں: پہلی قسم خداوند عالم سے صداقت ہے اور اس کا مطلب یہ ہے کہ اگر کہیں «إِیاکَ نَعْبُدُ وَ إِیاکَ نَسْتَعینُ» تو سچ کہیں۔ دوسری قسم چہاردہ معصومین (علیہم السلام) سے صداقت ہے۔ اس کا مطلب یہ ہے کہ اگر ہم کہتے ہیں کہ ہم ائمہ طاہرین (علیہم السلام) سے محبت کرتے ہیں تو ہمارے عمل میں بھی اس کا اظہار ہونا چاہئے۔ اور تیسری قسم گھر میں صداقت ہے یعنی میاں بیوی کے لیے ضروری ہے کہ گھر میں ان کے درمیان صداقت قائم ہو۔ میاں بیوی ہونے کے علاوہ انہیں گھر میں ایک دوسرے کا دوست ہونا چاہئے۔
