حوزہ نیوز ایجنسی کے مطابق، مرکزی سیکرٹری جنرل شیعہ علماء کونسل پاکستان علامہ شبیر حسن میثمی نے شیعہ علماء کونسل پاکستان ضلع گجرات کی جانب سے منعقدہ ضلع کونسل اجلاس میں خصوصی شرکت کی اور خطاب کرتے ہوئے کہا: میں تمام ضلعی اراکین کا شکریہ ادا کرتا ہوں اور میلاد صادقین علیہم السلام کے پُر مسرت موقع پر مبارکباد پیش کرتا ہوں۔
انہوں نے کہا: اس وقت تنظیم کو نظم و ضبط کے ساتھ اور زیادہ متحرک کرنے کی ضرورت ہے۔
مرکزی سیکرٹری جنرل شیعہ علماء کونسل پاکستان نے کہا: قائد ملت جعفریہ پاکستان آیت اللہ سید ساجد علی نقوی جیسی عظیم قیادت ملت تشیع کے پاس موجود ہے، حکمت عملی سے عوامی مسائل و مشکلات میں ان کے جائز مسائل کے حل کے لیے بہترین اقدامات اٹھانا تنظیمی ذمہ داران کا فرض اولین ہے۔
انہوں نے مزید کہا: ہمارے آقا و مولا امیر المومنین علی ابن ابی طالب علیہ السلام کا درس بھی یہی ہے، تنظیم جتنی مضبوط و متحرک ہوگی اتنا ہی آپ اتحاد اُمت کے لیے سرگرم ہوں گے، اس لیے مل کر محبت و اخوت کے ساتھ جدوجہد جاری رکھیں۔
