ترجمہ و ترتیب: محترمہ سیدہ نصرت نقوی

حوزہ نیوز ایجنسی| مارک کارنی کو حکمران لبرل پارٹی کا نیا سربراہ منتخب کر لیا گیا ہے، جو جسٹن ٹروڈو کی جگہ سنبھالیں گے۔ یہ تبدیلی ایسے وقت میں آئی ہے جب کینیڈا کو امریکہ کے ساتھ تاریخی کشیدگی اور تجارتی جنگ کے خدشات کا سامنا ہے۔

مارک کارنی کی قیادت میں لبرل پارٹی: کامیابی یا ناکامی؟

کینیڈا کی سیاست ایک اہم موڑ پر کھڑی ہے جہاں لبرل پارٹی کے نئے قائد مارک کارنی کی قیادت میں پارٹی کے مستقبل کا فیصلہ ہونے جا رہا ہے۔ کیا وہ پارٹی کو دوبارہ عروج کی طرف لے جا سکیں گے یا ان کی قیادت مختصر المدت ثابت ہوگی؟ یہ وہ سوالات ہیں جو اس وقت کینیڈا کے سیاسی حلقوں میں گردش کر رہے ہیں۔

سیاسی پس منظر اور لبرل پارٹی کا چیلنج

2015 سے برسر اقتدار لبرل پارٹی کے لیے سب سے بڑا چیلنج "انکومبینٹ فٹیگ" یعنی حکومت میں طویل عرصے تک رہنے کی وجہ سے عوام میں پیدا ہونے والی تھکن ہے۔ مغربی جمہوریتوں میں اکثر ایسا ہوتا ہے کہ ایک دہائی کے بعد حکمران جماعت کے خلاف عوام میں بے چینی بڑھنے لگتی ہے۔ یہی معاملہ کینیڈا میں بھی دیکھنے میں آ رہا ہے۔

سینئر صحافی کیتھرین ٹسالی کس کے مطابق، جو کہ سابق ڈپٹی وزیر اعظم کرسٹیا فری لینڈ کی سوانح عمری بھی لکھ چکی ہیں، عوام میں حکمرانوں کے خلاف بیزاری بڑھ رہی ہے۔ انہوں نے کہا:

"بہت سے مغربی، جی 7 ممالک میں لوگ موجودہ حکمرانوں سے تنگ آ چکے ہیں اور وہ تبدیلی چاہتے ہیں۔"

مارک کارنی: کیا وہ حقیقی تبدیلی لا سکتے ہیں؟

مارک کارنی کے آنے سے یہ سوال پیدا ہوا کہ کیا وہ جسٹن ٹروڈو کی سیاست سے مختلف حکمت عملی اپنائیں گے یا پھر وہ صرف پارٹی میں معمولی تبدیلیاں لا کر عوامی جذبات کو ٹھنڈا کرنے کی کوشش کریں گے؟ کیتھرین ٹسالی کس کے مطابق:"کارنی کے پاس سب سے بڑا موقع یہی تھا کہ وہ پارٹی کو ٹروڈو کے سائے سے نکال کر ایک نئی سمت میں لے جاتے۔ لیکن اصل سوال یہ ہے کہ وہ ٹروڈو سے کتنے مختلف ثابت ہوں گے؟ یہ ابھی واضح نہیں ہوا۔"

سیاسی تجزیہ کار موسکروپ کے مطابق، کارنی شاید وہ شخصیت نہ ہوں جو اس وقت عوامی جذبات کے مطابق سیاست کر سکیں، کیونکہ اس وقت عوام میں غصہ اور بے چینی پائی جاتی ہے، جسے ایک "پاپولسٹ" قیادت ہی بہتر انداز میں استعمال کر سکتی ہے۔

عوامی ترجیحات: معیشت، صحت، اور رہائش

اس وقت مہنگائی، صحت عامہ، اور رہائش جیسے مسائل کینیڈین عوام کے لیے سب سے اہم ہیں۔ عوام ایسے لیڈر کو دیکھ رہے ہیں جو ان کے معاشی مسائل کو سمجھے اور اس کا عملی حل پیش کرے۔ اس صورتحال میں کنزرویٹو پارٹی کے رہنما پیئر پولیو ایک پاپولسٹ طرز کی سیاست کر رہے ہیں، جو عوامی غصے کو اپنی حمایت میں تبدیل کرنے کی کوشش ہے۔

موسکروپ کے مطابق:

"یہ ضروری نہیں کہ جو لوگ متبادل حل پیش کر رہے ہیں وہ خود بھی قابلِ اعتماد ہوں۔ پیئر پولیو ایک اندرونی سیاسی کھلاڑی ہیں جو عوامی جذبات کا سہارا لے کر خود کو ایک عام آدمی کے طور پر پیش کر رہے ہیں۔ لیکن جب وہ اپنے وعدے پورے نہیں کر سکیں گے تو ان کا زوال یقینی ہوگا۔"

انتخابات: لبرلز کی حکمت عملی کیا ہوگی؟

کینیڈا میں اگلے وفاقی انتخابات 20 اکتوبر تک ہونا لازمی ہیں، تاہم لبرلز اس سے پہلے بھی انتخابات کا اعلان کر سکتے ہیں۔

لبرل پارٹی کے لیے کامیابی کی کم از کم حد کنزرویٹو پارٹی کو مکمل اکثریت حاصل کرنے سے روکنا ہے، تاکہ وہ سرکاری اپوزیشن بن سکیں۔ اگر وہ یہ مقام حاصل کر لیتے ہیں تو اسے ان کی بقا کے لیے ایک مثبت قدم سمجھا جائے گا۔ لیکن اگر وہ اس میں ناکام رہتے ہیں اور مزید نشستیں کھو دیتے ہیں تو مارک کارنی کے لیے قیادت برقرار رکھنا مشکل ہو جائے گا۔

کیا کارنی کا سیاسی کیریئر مختصر ثابت ہوگا؟

موسکروپ کے مطابق، اگر لبرل پارٹی کم از کم اپوزیشن کا درجہ بھی حاصل نہ کر سکی، تو مارک کارنی کا بطور پارٹی لیڈر مستقبل تاریک ہو جائے گا۔ ان کے الفاظ میں:"اگر آپ اپوزیشن لیڈر بھی نہیں بن سکتے، تو شاید پہلے دن ہی آپ کو جانا پڑے۔ آپ کا وقت ختم ہو چکا ہوگا۔"

انہوں نے مزید کہا:"میرے خیال میں لبرلز کے لیے سب سے معقول توقع یہ ہے کہ وہ سرکاری اپوزیشن بنیں۔ اگر وہ اس سے نیچے رہے تو یہ تباہی ہوگی، اور اگر اس سے اوپر گئے تو وہ ان کے لیے ایک بڑا بونس ہوگا۔"

نتیجہ: کارنی کے لیے چیلنجز اور امکانات

مارک کارنی کے لیے سب سے بڑا چیلنج یہ ہے کہ وہ عوام کے حقیقی مسائل پر توجہ دیں اور لبرل پارٹی کو جسٹن ٹروڈو کی پہچان سے الگ ایک نئی شناخت دیں۔ اگر وہ ایسا کرنے میں کامیاب ہو گئے تو وہ پارٹی کو دوبارہ متحرک کر سکتے ہیں، لیکن اگر وہ روایتی سیاست پر قائم رہے تو ان کے لیے قیادت زیادہ دیر تک برقرار رکھنا مشکل ہو جائے گا۔

آنے والے انتخابات نہ صرف لبرل پارٹی بلکہ مارک کارنی کے سیاسی مستقبل کا بھی فیصلہ کریں گے۔