حوزہ نیوز ایجنسی کے مطابق، مرکزی سیکرٹری جنرل شیعہ علماء کونسل پاکستان علامہ ڈاکٹر شبیر میثمی نے آج صبح ایران کے بعض حساس مقامات پر امریکی حملوں کی شدید مذمت کرتے ہوئے کہا: یہ امریکی کاروائی سنگین جنگی جرم ہے جو اقوام متحدہ کے چارٹر اور این پی ٹی کی صریحا خلاف ورزی ہے۔ ہم امریکہ کی جانب سے ایرانی سول جوہری تنصیبات پر غیر قانونی حملوں کی شدید مذمت کرتے ہیں۔
انہوں نے کہا: امریکہ سمیت برطانیہ، جرمنی اور فرانس کی سفارتکاری دھونس، دھمکی، دھوکے اور بدنیتی پر مبنی ہے۔
علامہ ڈاکٹر شبیر میثمی نے کہا: اسلامی ممالک کا جارح طاقتوں کے سامنے اپنی خودمختاری، امن، حق دفاع اور عدل کی خاطر متحد ہونا ناگزیر ہے۔
انہوں نے کہا: اس مشکل وقت میں پوری پاکستانی قوم ایران کی شجاع و غیور قیادت، افواج اور عوام کے شانہ بشانہ کھڑی ہے۔
مرکزی سیکرٹری جنرل شیعہ علماء کونسل پاکستان نے مزید کہا: ملت ایران نے اسرائیل کی ناک رگڑ کر تمام مظلوموں اور باضمیر انسانوں کے سر فخر سے بلند کیے ہیں۔ امریکہ کا ایران پر براہ راست حملہ عالمی اور مشرق وسطیٰ کے امن و اقتصاد کو ملیا میٹ کرنے کے مترادف ہے۔
انہوں نے کہا: امریکہ کے اس گھناؤنے اقدام سے ثابت ہوا کہ عالمی اداروں UN اور IAEA کی کوئی وقعت اور حیثیت نہیں ہے۔
علامہ ڈاکٹر شبیر میثمی نے کہا: سفارتکاری اور امن کے تمام تر اصولوں کو روندنے والے امریکی صدر کی نوبل انعام کے لیے نامزدگی شرمناک ہے۔
آپ کا تبصرہ