اگر مسلمان اسرائیل کو تیل دینا بند کر دیں تو اسرائیل تباہ ہو جائے گا: مولانا سید رضا حیدر زیدی

حوزہ نیوز ایجنسی کی رپورٹ کے مطابق، مولانا سید رضا حیدر زیدی نے امام جعفر صادق علیہ السلام کی حدیث "دنیا سے چار چیزیں مت مانگو، کیونکہ وہ تمہیں نہیں ملیں گی اور تمہارے پاس ضرور ہونی چاہیے ایسا عالم جو اپنے علم کو استعمال کرتا ہو تو تم بغیر عالم کے رہ جاؤ گے، ایسا عمل جو ریاکاری سے خالی ہو، تو تم بغیر عمل کے رہ جاؤ گے، ایسا کھانا جو مشتبہ نہ ہو ورنہ تم بغیر کھانے کے رہ جاؤ گے اور ایسا دوست جو بے عیب ہو ورنہ تم بغیر دوست کے رہ جاؤ گے۔" کو بیان کرتے ہوئے کہا کہ ہر ایک میں کوئی نہ کوئی کمی ضرور ہوتی ہے لہذا اگر کوئی چاہے کہ ایسا اہل علم ملے جو سو فیصد عمل کرتا ہو تو وہ نہیں ملے گا اور اگر ملے گا بھی تو بہت مشکل سے ملے گا۔

انہوں نے امیر المؤمنین علیہ السلام کی حدیث "خدایا! تجھے لائق عبادت سمجھ کر عبادت کرتا ہوں۔" کو بیان کرتے ہوئے کہا کہ ظاہر ہے جو جنت کی لالچ میں عمل کر رہا ہے تو جنت بھی غیر خدا ہے وہ بھی حقیقی مقام عبادت نہیں ہے۔

امام جمعہ لکھنؤ نے خمس کی اہمیت کی جانب اشارہ کرتے ہوئے کہا کہ اگرچہ کوئی عام انسان کے مال کو چوری نہیں کر رہا ہے، لیکن اگر خمس نہیں نکال رہا ہے تو بہرحال امام کے مال میں چوری ضرور کر رہا ہے۔

مولانا سید رضا حیدر زیدی نے مخلص دوست کا ذکر کرتے ہوئے کہا کہ اگر ہمیں مخلص دوست نہ ملے تو کم از کم خود کسی کے مخلص دوست بن جائیں، یعنی دوسروں کو نہ سدھار سکیں تو کم از کم خود کو سدھار لیں۔

انہوں نے رسول اللہ صلی اللہ علیہ وآلہ وسلم کی حدیث "3 لوگوں پر رحم کھاؤ۔ ایسا مالدار جو فقیر ہو گیا ہو، ایسی قوم کا باعزت شخص جو ذلیل ہو گیا ہو اور ایسا عالم جس سے احمق اور جاہل لوگ کھیل رہے ہوں۔" کو بیان کرتے ہوئے کہا کہ ایسا عالم اور فقیہ جس سے جاہل کھیل رہے ہوں تو اس کا مذاق نہیں اڑانا چاہیے، بلکہ اس پر رحم کھانا چاہیے۔

مولانا سید رضا حیدر زیدی نے ماہ صفر میں دعا "یا شديد القوى....." پڑھنے کی تاکید کرتے ہوئے کہا کہ سب سے بڑی طاقت اللہ ہے۔

انہوں نے فلسطین میں ہو رہے مظالم پر عالمی برادری کی خاموشی کو حیرت انگیز بتاتے ہوئے کہا کہ ایران میں ایک لڑکی مہسا امینی کی موت ہوئی تو پوری دنیا میں واویلا مچ گیا، لیکن آج فلسطین میں لاکھوں بچے قتل کر دیے گئے، 10 لاکھ سے زیادہ بچے بھوکے ہیں، لیکن اس پر عالمی برادری اور انسانی حقوق کی عالمی تنظیموں کی خاموشی حیرت انگیز ہے اور اگر کوئی بولتا بھی ہے تو صرف فارمیلٹی ادا ہوتی ہے۔

مولانا سید رضا حیدر زیدی نے ترکی کے صدر طیب اردوغان سمیت مسلم ممالک کے حکمرانوں کی خیانتوں کی جانب اشارہ کرتے ہوئے کہا کہ غیر مسلم ممالک ہی نہیں، بلکہ مسلم ممالک بھی فلسطین میں جاری مظالم پر نہ صرف یہ کہ مظلوموں کا ساتھ نہیں دے رہے ہیں، بلکہ پس پردہ ظالم کی حمایت کر رہے ہیں جیسا کہ ترکی کے ایم پی نے اردوغان سے پارلیمنٹ میں کہا کہ غزہ میں جو پائلٹ بم گرا رہے ہیں ان کی ٹریننگ ترکی میں ہو رہی ہے۔

امام جمعہ لکھنؤ نے آذربائیجان کی خیانتوں کا ذکر کرتے ہوئے کہا کہ آذربائیجان میں اسرائیلی اڈے ہیں جہاں سے ایران پر حملہ ہوا، آذربائیجان سے اسرائیل کو 40 فیصد تیل مل رہا ہے جو ترکی کے راستے جا رہا ہے۔ اگر مسلمان اسرائیل کو تیل دینا ہی بند کر دیں تو اسرائیل کا تیل نکل جائے۔

مولانا سید رضا حیدر زیدی نے ایران کی قیادت عظمیٰ کا ذکر کرتے ہوئے کہا کہ ایران کی قیادت عظمیٰ راہ کربلا پر گامزن ہے، یہاں فتوؤں کا کاروبار نہیں ہوتا، بلکہ فتویٰ دے کر دین کو استحکام اور اس کی حفاظت کی جاتی ہے۔