حوزہ نیوز ایجنسی کی رپورٹ کے مطابق، ایران کے صوبہ گلستان میں نمائندہ ولیِ فقیہ آیت اللہ سید کاظم نور مفیدی نے شہر گرگان میں “امت کے شہید امام” کے عنوان سے منعقدہ عوامی اجتماع سے خطاب کرتے ہوئے لوگوں کی پرجوش شرکت پر ان کا شکریہ ادا کیا۔
انہوں نے کہا: اگر دنیا کے لوگ اب تک ایرانی قوم کو اچھی طرح نہیں جانتے تھے تو رہبرِ معظم انقلاب کی شہادت کے بعد ہونے والے یہ بڑے اجتماعات ثابت کرتے ہیں کہ ایرانی قوم اپنے نظام، ملک اور اپنے اصولوں سے کتنی وابستہ ہے۔
انہوں نے کہا: اللہ تعالیٰ اپنے وفادار بندوں کی قدر کرتا ہے۔ قرآن کریم کے وعدے کے مطابق جو لوگ حق کے راستے پر چلتے ہیں اور اقدار کے دفاع کے لیے کھڑے ہوتے ہیں، اللہ ان کی قدر کرتا ہے۔ ہمیں یقین ہے کہ اس ثابت قدمی کا نتیجہ ایرانی قوم کی کامیابی اور دشمنوں اور مستکبروں کی شکست کی صورت میں ظاہر ہو گا۔
آیت اللہ نور مفیدی نے ایرانی قوم کی قدیم تاریخ اور تہذیب کی طرف اشارہ کرتے ہوئے کہا: ایرانی قوم ایک قدیم اور باوقار قوم ہے جس کی ہزاروں سال پرانی تہذیبی تاریخ ہے۔ اس قوم نے اسلام سے پہلے اور بعد دونوں ادوار میں دنیا کو بے شمار علمی اور ثقافتی شخصیات دی ہیں اور ان عظیم مفکرین کے نظریات آج بھی دنیا کی یونیورسٹیوں اور علمی مراکز میں مورد توجہ رہتے ہیں۔
صوبہ گلستان میں نمائندہ ولیِ فقیہ نے خطے کی صورتحال میں استکباری طاقتوں کے کردار کا ذکر کرتے ہوئے کہا: دشمنوں نے اپنے مقاصد حاصل کرنے کے لیے اس خطے میں صہیونی حکومت قائم کی لیکن ایرانی قوم نے اپنے ایمان، تاریخ اور شناخت کے سہارے ان سازشوں کے مقابلے میں ثابت قدمی دکھائی ہے۔
انہوں نے ایرانی مسلح افواج کی خدمات کو سراہتے ہوئے کہا: سپاہ پاسداران، ایران کی اسلامی جمہوریہ کی فوج اور دیگر فوجی و سیکیورٹی ادارے دن رات قوم اور ملک کے دفاع کے لیے کوشاں ہیں۔ ہم اللہ تعالیٰ سے دعا کرتے ہیں کہ وہ انہیں مزید نصرت، قوت اور عزت عطا فرمائے۔
آیت اللہ نور مفیدی نے شبِ قدر کی آمد کا ذکر کرتے ہوئے کہا: ہم عوام سے درخواست کرتے ہیں کہ ان بابرکت راتوں میں اپنی ذاتی دعاؤں سے پہلے ملک کی عزت و سربلندی، ایرانی قوم کی کامیابی، دشمنوں کے شر سے حفاظت اور اس نظام کی رہنمائی و قیادت کے تسلسل کے لیے دعا کریں۔
انہوں نے قومی اتحاد اور ہم آہنگی کی اہمیت پر زور دیتے ہوئے کہا: آج ہمارا سب سے بڑا ہتھیار قومی یکجہتی ہے، اس لیے سب کو چاہیے کہ ایسی کوئی بات زبان پر نہ لائیں جو معاشرے میں تفرقہ پیدا کرے۔
آپ کا تبصرہ