حوزہ نیوز ایجنسی کی رپورٹ کے مطابق، آیت اللہ العظمیٰ حسین نوری ہمدانی نے کہا ہے کہ عوام کی فکری و ثقافتی سلامتی کا تحفظ، معاشرے میں امید اور حماسی جذبے کو فروغ دینا حوزۂ علمیہ کے اساتذہ کی اہم ترین ذمہ داریوں میں شامل ہے۔ انہوں نے تاکید کی کہ موجودہ حساس حالات میں دینی بصیرت، اتحاد اور ولایت کے محور پر یکجہتی کو مزید مضبوط بنانے کی ضرورت ہے۔
انہوں نے یہ بات حوزۂ علمیہ قم میں “حوزۂ علمیہ، امتِ مبعوث، بیعت با ولایت” کے عنوان سے منعقدہ اعلیٰ و خارج سطح کے اساتذہ کے اجلاس کے نام اپنے پیغام میں کہی۔
آیت اللہ نوری ہمدانی نے اپنے پیغام میں کہا: “موضوع وحدت اور قیام للہ کو قرآن کریم میں خاص اہمیت دی گئی ہے اور اسلامی نظام کی کامیابی بھی وحدت، یکجہتی اور ولایت فقیہ کے محور پر ہم آہنگی سے وابستہ ہے۔ آج عوام اور اسلامی نظام کے ذمہ داران، رہبرِ انقلاب آیت اللہ سید مجتبیٰ حسینی خامنہ ای کی قیادت میں اقتدار و عزت کی چوٹیوں کی طرف گامزن ہیں اور اساتذۂ حوزہ اس تحریک کو مضبوط بنانے میں اہم کردار ادا کر رہے ہیں۔”
انہوں نے مزید کہا: “دینی اقدار کا تحفظ، ایک مؤمن، متحد اور طاقتور معاشرے کی تشکیل، ملکی و عالمی تبدیلیوں میں فعال کردار ادا کرنا اور انقلابی حوزہ کے فکر و نظریے کو فروغ دینا اساتذہ کی اہم ذمہ داری ہے، جس کے لیے سنجیدہ اور ہمہ جہت کوششوں کی ضرورت ہے۔”
مرجع تقلید نے اساتذہ سے خطاب کرتے ہوئے کہا: “آج عوام کے درمیان موجود رہنا، ان کی فکری اور ثقافتی سلامتی کی پاسداری کرنا اور ان میں امید اور حماسی روح پیدا کرنا آپ کی تنظیم کی اولین ترجیحات میں شامل ہونا چاہیے۔”
انہوں نے رہبرِ انقلاب کی ہدایات پر عمل کی ضرورت پر زور دیتے ہوئے کہا کہ ایران کے قومی مطالبات سے متعلق جاری مذاکرات میں اعلان کردہ سرخ لکیر کی مکمل رعایت کی جانی چاہیے۔
پیغام کے اختتام پر آیت اللہ نوری ہمدانی نے رہبرِ انقلاب، ایرانی عوام، اساتذۂ حوزہ اور مجاہدین کی کامیابی و سربلندی کے لیے دعا کرتے ہوئے اجلاس کے منتظمین کا شکریہ ادا کیا۔
آپ کا تبصرہ