حوزہ نیوز ایجنسی کی رپورٹ کے مطابق، بحرین ہیومن رائٹس سوسائٹی نے بحرینی حکومت سے مطالبہ کیا ہے کہ شیعہ مسلمانوں کے مذہبی شعائر اور عزاداری کے جلوسوں پر عائد تمام پابندیاں فوری طور پر ختم کی جائیں اور شہریوں کو آئین اور بین الاقوامی قوانین کے مطابق آزادانہ طور پر اپنے مذہبی مراسم ادا کرنے کی اجازت دی جائے۔
بحرین ہیومن رائٹس سوسائٹی نے اپنے بیان میں حکومت کے ان اقدامات کی مذمت کی جن کے نتیجے میں تقریباً 50 عزاداری کے مراکز، حسینیوں اور مذہبی انجمنوں کو ختم یا منسوخ کیا گیا ہے۔
تنظیم نے کہا کہ یہ اقدامات بحرین کے ان بین الاقوامی معاہدوں کی خلاف ورزی ہیں جن پر حکومت نے دستخط کیے ہیں، جن میں شہری و سیاسی حقوق کا بین الاقوامی معاہدہ، انسانی حقوق کا عالمی اعلامیہ اور عرب انسانی حقوق کا منشور شامل ہیں۔
بیان میں کہا گیا ہے کہ شیعہ شہریوں کے خلاف یہ اقدامات کسی ایک واقعے تک محدود نہیں بلکہ گزشتہ عرصے میں جاری منظم دباؤ اور پابندیوں کی پالیسی کا حصہ ہیں۔ اس دوران اربعین کی زیارت اور اس سے متعلق سرگرمیوں میں رکاوٹیں، شیعہ مذہبی شعائر پر پابندیاں، پُرامن مظاہروں میں شرکت کرنے والوں کی گرفتاریاں اور متعدد شیعہ علما و مذہبی شخصیات کی گرفتاریوں کی اطلاعات سامنے آئی ہیں۔
بحرین ہیومن رائٹس سوسائٹی کے مطابق، حالیہ عرصے میں مذہبی پابندیوں میں مزید اضافہ ہوا ہے۔ عزاداری کے موکبوں کی اجازت محدود کرنے، مجالس اور دیگر مذہبی سرگرمیوں کو حسینیوں اور عزاخانوں تک محدود رکھنے اور مذہبی پروگراموں کو ایک مقررہ وقت پر ختم کرنے جیسے اقدامات کیے جا رہے ہیں۔
اس تنظیم نے بحرین کے جعفری اوقاف کے ادارے پر بھی تنقید کرتے ہوئے کہا کہ یہ ادارہ شیعہ برادری کے خلاف عائد کی جانے والی پابندیوں کے نفاذ میں حکومت کا ساتھ دے رہا ہے۔
تنظیم نے مطالبہ کیا کہ حسینیہ، عزاخانوں اور مذہبی اداروں پر تمام سکیورٹی پابندیاں ختم کی جائیں، مذہبی سرگرمیوں کی وجہ سے ان کے منتظمین کو طلب یا دباؤ میں نہ لایا جائے اور مذہب و عقیدے کی بنیاد پر امتیازی سلوک کا خاتمہ کیا جائے۔
بحرین ہیومن رائٹس سوسائٹی نے اقوام متحدہ کے مذہبی آزادی اور پُرامن اجتماع و انجمن سازی کی آزادی کے خصوصی نمائندوں سے بھی مطالبہ کیا کہ بحرین میں شیعہ برادری کے خلاف ہونے والی مبینہ خلاف ورزیوں کی نگرانی کریں اور بحرینی حکومت پر زور دیں کہ وہ اپنی بین الاقوامی انسانی حقوق کی ذمہ داریوں کی پاسداری کرے۔
آپ کا تبصرہ