حوزہ نیوز ایجنسی کی رپورٹ کے مطابق، اسلامی تحریک نائجیریا کے رہنما شیخ ابراہیم زکزاکی نے ابوجا میں پرائمری اور سیکنڈری سطح کے طلبہ کے لیے منعقدہ اسلامی پیشہ ورانہ تربیتی اجتماع (IVC) کی اختتامی تقریب سے خطاب کرتے ہوئے کہا: ایسے علوم کے حصول کے لیے کوشش کریں جو ان کے لیے، ان کے دین اور معاشرے کے لیے مفید ہوں۔
انہوں نے اپنے خطاب میں IVC پروگرام کو بچوں اور نوجوانوں کی تربیت اور تیاری کا ایک اہم موقع قرار دیا اور کہا: اس پروگرام کا مقصد صرف اسکول کی تعلیم دینا نہیں بلکہ طلبہ کی فکر اور سوچ کی اصلاح بھی ہے تاکہ وہ درست انداز میں سوچ سکیں اور دین کو صحیح طور پر جان اور سمجھ سکیں۔
شیخ زکزاکی نے بچوں کی فکری تربیت کی اہمیت کی طرف اشارہ کرتے ہوئے کہا: انسانی ذہن کو صحیح اور تعمیری افکار کے ذریعہ زندہ اور فعال رکھنے کی ضرورت ہے۔ اس لیے طلبہ کو چاہیے کہ وہ نوجوانی ہی سے علم حاصل کرنے اور اپنی فکری صلاحیتوں کو مضبوط بنانے کے لیے بھرپور استفادہ کریں۔
اسلامی تحریک نائجیریا کے رہنما نے طلبِ علم میں نیت کی اہمیت پر بھی زور دیا اور طلبہ سے کہا: وہ اللہ تعالیٰ کی رضا اور معاشرے کی خدمت کے لیے علم حاصل کریں۔
انہوں نے کہا: دنیا و آخرت میں انسان کے لیے مفید اور معاشرے کے لیے فائدہ مند ہر علم اگر خدائی نیت کے ساتھ حاصل کیا جائے تو عبادت شمار ہوتا ہے۔ انہوں نے طب و صحت، زراعت، سائنس، نقل و حمل اور دیگر مفید علوم کو اس کی مثالوں میں شمار کیا۔
شیخ زکزاکی نے جمہوریہ اسلامی ایران کی مثال دیتے ہوئے علم و دانش کو اس کی ترقی اور موجودہ حالات میں اس کی طاقت کا ایک اہم عامل قرار دیتے ہوئے کہا: علم و دانش نے ایران کو موجودہ چیلنجز کا مقابلہ کرنے اور استقامت کا مظاہرہ کرنے میں اہم کردار ادا کیا ہے۔
انہوں نے آخر میں طلبہ کو اپنے اور معاشرے کے لیے مفید علم حاصل کرنے کی مزید کوشش کرنے کی دعوت دی اور معاشرے کو درپیش مسائل اور ضروریات کے حل تلاش کرنے کے لیے علم سے استفادہ کرنے کی ضرورت پر زور دیا۔
آپ کا تبصرہ