حوزہ نیوز ایجنسی کی رپورٹ کے مطابق، چیئرمین الصادق انسٹیٹیوٹ آف اسلامک بینکنگ سسٹم، ممبر شریعہ ایڈوائزی کمیٹی اسٹیٹ بینک آف پاکستان و مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے اسٹیٹ بینک آف پاکستان کی جانب سے منعقدہ 41 ویں آئی ایف ایس بی (IFSB) کونسل میٹنگ میں شرکت کی۔

علامہ شبیر حسن میثمی کا میڈیا کو بریفنگ دیتے ہوئے کہنا تھا کہ اس وقت بینکنگ سسٹم میں سب سے بڑا مسئلہ ربا (سود) کا ہے اور اس طرح کی کانفرنسز میں اس چیز (ربا) کے خاتمے کے لیے بحث ہونا ایک اچھا عمل ہے۔

انہوں نے کہا: پوری دنیا سے اسلامک بینکنگ کے نمائندگان مل کر (ربا سے پاک بینکاری کی) کوششوں میں مصروف عمل ہیں۔ ہم نے الصادق انسٹیٹیوٹ آف اسلامک بینکنگ سسٹم کی جانب سے کراچی میں اسی سلسلے میں ’’ربا فری کانفرنس‘‘ کا انعقاد کیا۔ جس میں مختلف بینکوں کے اہم ذمہ داران نے بھرپور شرکت کی۔

علامہ ڈاکٹر شبیر حسن میثمی نے کہا: الصادق انسٹیٹیوٹ اس وقت مملکت خداداد پاکستان کے جوانوں کی اسلامک بینکنگ سسٹم کے حوالے سے تربیت میں مصروف عمل ہے۔ ہماری یہ کوشش مستقبل کے حوالے سے بہت اہم ہے تاکہ ہم اپنے جوانوں کو اس چیز (ربا) سے بچا سکیں جو کہ اللہ اور اس کے رسول (ص) سے کھلی جنگ کے مترادف ہے۔

انہوں نے مزید کہا: موجودہ حکومت کی اس سلسلے میں کاوشیں قابل ستائش ہیں اورمیں اپنے ان تمام دوستوں سے بھی اپیل کرتا ہوں جو بینکنگ سسٹم میں اہم ذمہ داریوں پر ہیں کہ وہ اس سلسلے میں بھرپور اور مؤثر آواز بلند کریں۔