حوزہ نیوز ایجنسی کی رپورٹ کے مطابق، ایرانی صدر حجۃ الاسلام والمسلمین سید محمد ابراہیم رئیسی لیگ آف نیشنز کی جنرل اسمبلی کے سالانہ اجلاس میں شرکت کے لیے نیویارک پہنچ گئے ہیں۔
ایک اعلیٰ سطح کا سیاسی وفد بھی ان کے ہمراہ نیویارک گیا ہے، سید ابراہیم رئیسی کا طیارہ آج صبح مقامی وقت کے مطابق جان ایف کینیڈی ایئرپورٹ پر اترا جہاں لیگ آف نیشنز میں ایرانی سفیر نے ان کا استقبال کیا، اس موقع پر دیگر ایرانی سفارت کار بھی موجود تھے۔
امریکہ روانگی سے قبل صدر مملکت نے رہبر معظم انقلاب اسلامی ایران آیت اللہ العظمی سید علی خامنہ ای سے ملاقات کی، اس ملاقات میں صدر مملکت نے نیویارک میں اپنے پروگرام کے حوالے سے رپورٹ پیش کی جس پر رہبر معظم نے اتفاق کیا اور ان کے کامیاب دورے کے لیے نیک خواہشات کا اظہار کیا، صدر مملکت ایران نے نیویارک روانگی سے قبل کہا تھا کہ دنیا بھر کے ممالک اور علاقائی اور بین الاقوامی تنظیموں سے خطاب اسلامی جمہوریہ ایران کی اہم پالیسی رہی ہے۔
انہوں نے کہا کہ اقوام متحدہ کے رکن کی حیثیت سے ایران کو امید ہے کہ یہ بین الاقوامی ادارہ عالمی ترقی، سلامتی، امن اور انصاف کے فروغ میں فیصلہ کن کردار ادا کرے گا۔
ایرانی صدر نے کہا کہ وہ لیگ آف نیشنز کی جنرل اسمبلی کے سالانہ اجلاس میں حقائق پیش کریں گے اور مختلف ممالک کے رہنماؤں سے ملاقات کریں گے۔
اس سفر کے دوران ایرانی صدر ایک پریس کانفرنس بھی کریں گے جس میں وہ مختلف امور پر اسلامی جمہوریہ ایران کے موقف بیان کریں گے اور صحافیوں کے سوالات کے جوابات دیں گے۔
واضح رہے کہ حجۃ الاسلام والمسلمین سید محمد ابراہیم رئیسی گزشتہ سال بھی لیگ آف نیشنز کی جنرل اسمبلی کے سالانہ اجلاس میں شرکت کے لیے نیویارک گئے تھے۔
