حوزہ نیوز ایجنسی کی رپورٹ کے مطابق، آیت اللہ اعرافی نے مشرقی آذربائیجان کے دینی مدارس کے اساتذہ اور منتظمین سے خطاب کرتے ہوئے انقلاب اسلامی ایران کی سالگرہ کے موقع پر مبارکباد پیش کی۔
انہوں نے حوزہ علمیہ کے اصلاحاتی منصوبوں کا ذکر کرتے ہوئے کہا کہ آج دینی مدارس مستقبل کی منصوبہ بندی اور عملی حکمت عملی کے ساتھ آگے بڑھ رہے ہیں، اور متعدد بڑے اصلاحاتی پروجیکٹ نافذ کیے جا رہے ہیں۔ انہوں نے اس راہ میں حائل چیلنجز کا اعتراف کرتے ہوئے کہا کہ باوجود مشکلات کے، ان منصوبوں کا ایک بڑا حصہ کامیابی سے مکمل ہو چکا ہے۔
آیت اللہ اعرافی نے مهدویت کے مسئلے کی اہمیت پر زور دیتے ہوئے کہا کہ یہ نہ صرف اہل تشیع کی بنیادی تعلیمات میں شامل ہے بلکہ انقلاب اسلامی کا بھی مرکزی نکتہ ہے۔ تاہم، موجودہ دور میں مهدویت کو مختلف شبہات اور الزامات کا سامنا ہے، جن کا مقابلہ کرنا اور اس عقیدے کو مستحکم کرنا دینی مدارس کی اہم ذمہ داری ہے۔
انہوں نے آئندہ منصوبوں کا ذکر کرتے ہوئے فقه معاصر، طلاب و اساتذہ کے لیے مالی فوائد کی بہتری، اور علمی و تبلیغی سطح کو بلند کرنے جیسے موضوعات پر بھی روشنی ڈالی۔
اپنے خطاب کے اختتام پر، انہوں نے مشرقی آذربائیجان کے حوزہ علمیہ کے اساتذہ اور منتظمین کی خدمات کو سراہا اور کہا کہ اس خطے کی درخشاں تاریخ دینی مدارس اور اسلامی جمہوریہ ایران کے مستقبل میں اہم کردار ادا کرے گی۔
آپ کا تبصرہ