حوزہ نیوز ایجنسی کی رپورٹ کے مطابق،آٹھ شوال المکرم سانحہ انہدام جنت البقیع مسلمین جہان کی تاریخ کا ایک سیاہ دن ہے اس سانحہ کی برسی کے موقعہ پر جموں وکشمیر انجمن شرعی شیعیان کے اہتمام سے مرکزی امام باڑہ بڈگام پر خصوصی مجلس منعقد ہوئی جہاں تلاوت کلام پاک کے بعد مرکزی ذاکرین نے مرثیہ خوانی کی مجلس کے آغاز میں حجت الاسلام سید محمد حسین صفوی نے خطبہ استقبالیہ پڑھا جس میں منہدم شدہ مقدسات کی تعمیر نوکا مطالبہ کیا گیا۔

مجلس میں جو علمائے دین حضرات شامل تھے ان میں حجۃ الاسلام سید محمد حسین موسوی گریند ، حجۃ الاسلام سید یوسف موسوی پاٹواو ہے۔ انہوں نے پیغمبر اکرمؐ کی صاحب زادی حضرت فاطمۃ الزہرا سلام اللہ علیھا اور انکی اولاد کی قبروں پر ضریحات کی تعمیر نو کے لئے دعا کی۔

انہوں نے کہا کہ امت مسلمہ مزار بقیع میں منہدم کردہ مقدسات کی تعمیر نو اور شان رفتہ کی بحالی کے لئے فکر مند ہیں اور اس کڑی کا بے صبری کے ساتھ انتظار کر رہی ہیں۔

اس موقع پر انجمن شرعی شیعیان کے صدر حجۃ الاسلام والمسلمین آغا سید حسن الموسوی الصفوی نے انہدام جنت البقیع کے پس پردہ حکومت آل سعود کی فکر و ذہنیت اور مکروہ مقاصد کے مختلف گوشوں کی وضاحت کی۔

آغا صاحب نے کہا کہ جنت البقیع دنیائے اسلام کا سب سے مقدس اور معروف قبرستان ہے جہاں اہلبیت نبوی ؑ کے ساتھ ساتھ گیارہ ہزار اصحاب و تابعین مدفون ہیں اور پیغمبر اسلام ؐ اکثر رات کو اس قبرستان کی زیارت کو جایا کرتے تھے قرون اولیٰ کے مسلمانوں نے اس قبرستان میں مدفون اہلبیت نبوی ؑ اور دیگر برگزیدہ اصحاب کی قبروں پر ضریحات تعمیر کرکے اپنے والہانہ عشق و عقیدت کا مظاہرہ کیا۔

بارہ صدیوں تک یہ ضریحات ان قبروں پر قائم رہے اور مسلمانوں کے عشق و عقیدت کا مرکز بنے رہے جنت البقیع میں اہلبیت ؑ اور اصحاب نبو ی ؐ کی قبروں کو مسمار کرکے حکومت آل سعود نے امت مسلمہ کے جذبات کو مجروح کیا اور اہلبیت نبوی ؐ سے اپنے موروثی حسد و نفرت کا بد ترین مظاہرہ کیا۔

آغا حسن نے کہا کہ عرب حکمرانوں کو سرزمین عرب میں صنم خانوں اور گرجاگروں کی تعمیر پر کوئی اعتراض نہیں لیکن پیغمبر اکرم ؐ کی صاحب زادی حضرت فاطمۃ الزہرا ؑ اور انکی اولاد کی قبروں پر ضریحات کی تعمیر کسی بھی قیمت پر گوار نہیں۔

انہوں نے کہا کہ امت مسلمہ مزار بقیع میں منہدم کردہ مقدسات کی تعمیر نو اور شان رفتہ کی بحالی کے لئے فکر مند ہیں۔تقریب کے اختتام پر جنت البقیع کی از سر نو تعمیر کے لئے ایک دستخطی مہم کا انعقد ہوا جس میں تقریب میں موجود تمام علمائے کرام اور دیگر حضرات نے اپنا امضا کرکے از سر نو تعمیر جنت البقیع کے لئے اپنا احتجاج درج کیا ۔