حوزہ نیوز ایجنسی کی رپورٹ کے مطابق، جموں و کشمیر کی علمی شخصیت آیۃ اللہ سید محمد باقر الموسوی الصفوی کے انتقال پر قاضی سید عبد الرشید کاظمی چھولاں اوڑی نے ملت کشمیر کے نام پر تعزیتی پیغام جاری کرتے ہوئے کہا ہے کہ آیۃ اللہ سید محمد باقر موسوی الصفوی کے انتقال نے علمی دنیا میں ایک ایسا خلا پیدا کر دیا ہے جسے صدیوں تک پورا کرنا شاید ممکن نہ ہو۔
مولانا کاظمی نے مزید کہا کہ مرحوم و مغفور آیۃ اللہ سید محمد باقر کو کشمیر کے مشہور و معروف سید خاندان کی علمی میراث کا امین ہونے کے ساتھ ساتھ مشہور زمانہ کتاب الغدیر کی جلدوں کے اردو ترجمے کا بھی شرف حاصل رہا ہے اور یقیناً مرحوم کی یہ خدمت ان کی اخروی زندگی کی باقیات الصالحات میں شمار ہوگی۔
انہوں نے مزید کہا کہ اس عظیم مصیبت پر عالم تشیع و تمام علمائے کشمیر منجملہ حجۃ الاسلام و المسلمین آقای سید حسن الموسوی الصفوی، حجۃ الاسلام و المسلمین آقای سید عبد الحسین الموسوی الصفوی، حجۃ الاسلام و المسلمین آقا سید ہادی الموسوی الصفوی، حجۃ الاسلام و المسلمین آقای سید احمد موسوی الصفوی، حجۃ الاسلام و المسلمین آقای سید عقیل الموسوی الصفوی اور رکن پارلیمینٹ سید روح اللہ مہدی کی خدمت میں اور مرحوم کے خانوادہ کی خدمت میں تسلیت و تعزیت پیش کرتے ہیں اور بارگاہ خداوندی میں مرحوم کے بلندی درجات کے لیے دعا گو ہیں۔
آپ کا تبصرہ