حوزہ نیوز ایجنسی کی رپورٹ کے مطابق، حوزہ علمیہ ایران کے سربراہ آیت اللہ علی رضا اعرافی نے ایک بیان جاری کرتے ہوئے عالمی استکبار اور صیہونی طاقتوں کی طرف سے مرجعیتِ شیعہ اور رہبر معظم انقلاب اسلامی حضرت آیت اللہ العظمیٰ سید علی خامنہای (دام ظلہ) کی شان میں گستاخیوں کو امت مسلمہ کے لیے ناقابل برداشت قرار دیا ہے۔ انہوں نے خبردار کیا کہ ان بے ہودہ اقدامات کے نتیجے میں اسلامی دنیا کے آتشیں غیظ و غضب کو بھڑکنے سے کوئی روک نہیں سکتا۔
آیت اللہ اعرافی نے اپنے بیان میں کہا ہے: "یہ وہ وقت ہے جب بیداری، بصیرت، استقامت اور استقامت کا مظاہرہ کرنے کی ضرورت ہے۔ خدا کے فضل سے ایران کی بیدار قوم، غیرتمند نوجوان، مسلح افواج اور تمام طبقات اس اہم مرحلے میں وطن عزیز اور انقلاب اسلامی کے دفاع میں سینہ سپر ہیں، جبکہ مراجع عظام اور علما کرام اس راہ میں ہمارے رہنما اور ہمقدم ہیں۔"
انہوں نے زور دے کر کہا کہ مرجعیتِ شیعہ پر حملہ صرف ایک شخص یا مقام پر نہیں بلکہ پوری امتِ اسلامی کی عزت، دینی تشخص اور فکری استقامت پر حملہ ہے، اور یہ عالمی قوانین، بین الاقوامی اصول اور انسانی شرافت کے خلاف ایک کھلی بغاوت ہے۔
مدیر حوزہ علمیہ ایران نے عالمی اداروں، اسلامی ممالک، علمی و ثقافتی مراکز اور تمام آزاد ضمیر انسانوں سے مطالبہ کیا کہ: "وہ اس کھلی جسارت کے خلاف واضح اور دوٹوک موقف اختیار کریں تاکہ ایسے خطرناک اقدامات کی تکرار نہ ہو۔"
انہوں نے مزید کہا: "حوزہ علمیہ قم اور دنیا بھر کے حوزات، مراجع کرام، علمائے دین، دینی و علمی ادارے اور عالمی حریت پسند اس اہانت آمیز اقدام کی شدید الفاظ میں مذمت کرتے ہیں اور مرجعیتِ شیعہ کی عزت کے تحفظ کے لیے ہر ممکن قربانی دینے کا اعلان کرتے ہیں۔"
آخر میں انہوں نے واضح کیا کہ اگر اس نوعیت کی جسارتیں دوبارہ دہرائی گئیں تو وہ ایسے سخت نتائج کو جنم دے سکتی ہیں جن کا تصور بھی ممکن نہیں۔
آپ کا تبصرہ