شاعر: مولانا محمد ابراہیم نوریَ قمی
بقائے گلشنِ دینِ حمید ہے ترا غم
کہ خارِ چشمِ یزیدِ پلید ہے ترا غم
گذر گئے ہیں زمانے تری شہادت کو
مگر جہان میں اب بھی جدید ہے ترا غم
غموں کے مارے ہوؤں کے لئے زمانے میں
قسم خدا کی دوائے مفید ہے ترا غم
ہے تیری ذات حسینا سفینۂ مُنجی
مری نجات کی وجہِ امید ہے ترا غم
سنا ہے کُھلتا ہے جن سے درِ بہشتِ بریں
انہیں کلیدوں میں سے اک کلید ہے ترا غم
حسینیوں کے دلوں کے لئے ہے سکونِ شدید
یزید زادوں پہ ضربِ شدید ہے ترا غم
رگِ حیات کی مانند ہے محب کے لئے
ترے عدو سے تو بے حد بعید ہے ترا غم
جہانِ کرب و بلا میں کمی نہیں غم کی
تو منفرد ہے جہاں میں، فرید ہے ترا غم
توُ آفتاب شہادت تو ماہتاب ہے یہ
کہ زندہ تیری طرح اے شہید ہے ترا غم
جسے گرانے کی کوشش میں مر رہے ہیں عدو
وہ پختہ نوری فصیلِ حدید ہے ترا غم
از قلم: مولانا محمد ابراہیم نوری قمی
آپ کا تبصرہ