حوزہ نیوز ایجنسی کی رپورٹ کے مطابق، جموں و کشمیر انجمنِ شرعی شیعیان کے اہتمام سے چھٹی محرم کو بھی وادی بھر میں جلوس ہائے عزاء برآمد ہوئے، جن میں ہزاروں عزاداروں نے شرکت کی۔
جن مقامات پر تنظیم کے مشتہر شدہ پروگرام کے تحت علم شریف کے جلوس برآمد کئے گئے ان میں جلوس علم شریف از زوری گنڈ بڈگام، سونہ پاہ بیروہ، ڈرہ بل بمنہ ،کانی کچی میر بحری سرینگر،مغل محلہ سرینگر ،جڈی بل سرینگر ،چنگہ محلہ شالیمار،جے کے پی سی سی گلشن باغ ،گگلو محلہ ذال پورہ سوناواری، بڈی محلہ اندکھلوسوناواری ،ملہ پورہ نوگام شامل ہیں۔ علم شریف کا سب سے بڑا جلوس زوری گنڈ بڈگام سے برآمد ہو کر مرکزی امام باڑہ بڈگام میں اختتام پذیر ہوا۔ جلوس عزاء میں شامل عزاداروں سے خطاب کرتے ہوئے حجت الاسلام آغا سید مجتبیٰ عباس الموسوی الصفوی نے معرکہ کربلا کے مختلف گوشوں کی وضاحت کی۔
آغا مجتبیٰ نے شہدائے کربلا کو خراجِ عقیدت پیش کرتے ہوئے قیام حسینی ؑ کے اغراض و مقاصد اور ناگزیریت کی تشریح کی۔ انہوں نے کہا کہ صدیاں گزرنے کے باوجود معرکہ کربلا کی سرتازگی اور اہمیت و افادیت قائم و دائم ہے۔آغا مجتبیٰ نے کہا کہ پیغام عاشوراء کسی خاص مذہب یا مسلک کے لئے مخصوص نہیں، بلکہ یہ ایک آفاقی پیغام ہے، جس میں آج بھی وہی قوت اور کشش باقی ہے۔
انہوں نے کہا کہ کربلا حق و انسانیت کی سربلندی اور ظلم و باطل کی سرنگونی کی عملی درس گاہ ہے اور شہدائے کربلا سے عقیدت و محبت کا اولین تقاضا یہ ہے کہ ہم ہر حال میں حدود شریعت کا خیال رکھیں۔
آپ کا تبصرہ