حوزہ نیوز ایجنسی کی رپورٹ کے مطابق، جامع علی مسجد حوزہ علمیہ جامعة المنتظر ماڈل ٹاؤن میں مولانا ڈاکٹر سید محمد نجفی نے خطبۂ جمعہ دیتے ہوئے کہا کہ پانچویں تاجدار امامت حضرت امام محمد باقر علیہ السلام نے علومِ الٰہی کی ترویج کے لیے گراں قدر خدمات سر انجام دیں۔ آپ 7 ذوالحجہ کو 57 سال کی عمر میں شہید ہوئے۔ باقر العلوم کے نام سے مشہور امام کے بہت مشہور شاگرد ہیں۔ آپ شکل و صورت اور خلق میں حضور سرور کائنات حضرت محمد مصطفی صلی اللہ علیہ وآلہ وسلم سے مشابہ تھے۔
انہوں نے کہا کہ امام باقر علیہ السلام کی امامت کے ابتدائی سالوں میں حضرت عمر بن عبدالعزیز رضی اللہ عنہ کی حکومت نے باغ فدک اہل بیت اطہار ؑکو واپس کر دیا اور امیرالمومنین امام علی علیہ السلام پر کیا جانے والا سب وشتم بھی بند کروایا گیا۔
انہوں نے کہا امام باقر علیہ السلام کے والد گرامی حضرت امام زین العابدین اور والدہ فاطمہ بنت امام حسن ہیں، جن کا لقب صدیقہ ہے۔
ڈاکٹر سید محمد نجفی نے کہا امام جعفر صادق علیہ السلام کا فرمان ہے کہ ان کے والد گرامی امام محمد باقر ہر وقت ذکر خدا میں مشغول رہتے تھے۔
انہوں نے کہا کہ رسول اللہ صلی اللہ علیہ وآلہ وسلم نے فرمایا: اگر مرد اچھا اور خوبصورت لباس پہنے گا تو اللہ تعالی ٰان کی خواتین کی عزت وعفت میں اضافہ فرمائے گا۔ عظیم اسلامی مفکر شہید مرتضیٰ مطہری فرماتے ہیں دینی معاملات میں لوگوں کی پرواہ نہیں کرنی چاہیے، اپنے کام کے ساتھ مخلص ہو کر فقط اللہ کے لیے کام سر انجام دینے چاہیئں۔
آپ کا تبصرہ