حوزہ نیوز ایجنسی کی رپورٹ کے مطابق، شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے اپنے بیان میں کہا ہے کہ غاصب اسرائیلی فوج کے عالمی عدالت انصاف کے حکم کے باوجود رفح شہر پر حملے عدالتی احکامات کی سنگین خلاف ورزی ہے۔

انہوں نے مزید کہا کہ رفح میں بے گھر اور نہتے فلسطینیوں پر سفاکانہ کارروائیاں انسانی حقوق کے عالمی اداروں کے منہ پر تماچہ ہیں، اسرائیلی وزیراعظم نیتن یاہو بوکھلاہٹ کا شکار ہو کر معصوم بچوں کے ساتھ خون کی ہولی کھیل رہا ہے۔

علامہ شبیر میثمی نے کہا کہ فلسطینی عوام سے سات ماہ سے جاری غیر انسانی سلوک پر عالم اسلام کو واضح، دو ٹوک اور جرأت مندانہ کردار ادا کرنا چاہیئے تھا، جس میں اب تک مسلم ممالک بری طرح ناکام رہے ہیں، اس سے تو غیر مسلم ممالک، عوام اور طلباء ہیں جنہوں نے اسرائیلی سرپرستی کرنے والے ممالک امریکہ، برطانیہ، فرانس اور آسٹریلیا میں غزہ کے مظلومین کی حمایت میں اور اسرائیلی جارحیت کے خلاف صدائے احتجاج بلند کر کے انسانی اقدار وروایات کو حیات بخشی ہے۔