حوزہ نیوز ایجنسی کے مطابق، شیعہ علماء کونسل کے مرکزی رہنما نے جنوبی لبنان پر درندہ صفت ریاست کے حملے کی شدید مذمت کرتے ہوئے کہا: جنوبی لبنان پر صہیونی جارحیت کا حالیہ حملہ امت اسلامیہ کے لئے انتہائی تکلیف دہ اور بہت بڑی مصیبت ہے۔
انہوں نے کہا: اسرائیل جو کہ ہمیشہ سے بے لگام ہے اور اس کی بنیادی وجہ ہم امت مسلمہ کی کمزوری ہے چونکہ جب تک ہم اسرائیل کے سرپرستوں کے سامنے جھکے رہیں گے اس وقت تک میرے خیال میں اسرائیل اسی طرح بے لگام رہے گا اور جہاں اور جب چاہے گا بین الاقوامی قوانین کی خلاف ورزی کرتا رہے گا اور حتی کسی جنگی اصولوں کا بھی پاسدار نہیں ہو گا۔
شیعہ علما کونسل کے مرکزی رہنما نے مزید کہا: آج یہ وحشی درندہ ایک طرف غزہ و لبنان میں خواتین، بچوں اور نہتے افراد کو نشانہ بنا رہا ہے تو دوسری طرف اقوام متحدہ کے سکول، تعلیمی اداروں اور میڈیا سمیت دیگر حقوق انسانی کے اداروں کو بھی اپنی بربریت کی بھینٹ چڑھا دیا ہے۔
علامہ عارف حسین واحدی نے کہا: اس صہیونی جارح نے جب غزہ و فلسطین کو تاراج کیا اور جیسے اس کا دل چاہا اس نے وہاں بمباری کی اور اسے ملیا میٹ کر دیا اور کوئی اسے روکنے والا نہیں تو اب لبنان میں بھی وہی سمجھ رہا ہے کہ وہ جو اس کا دل چاہے وہ کر سکتا ہے اور بدقسمتی سے عالمی برادری کی جانب سے کسی قسم کی مذمت یا عالمی سطح پر کوئی اقدام نہیں ہو گا حالانکہ عین اس وقت جب اقوام متحدہ میں دنیا بھر کے حکمران اکٹھے ہیں تو ان کی ذمہ داری بنتی ہے کہ وہ فوری ایکشن لیں اور سلامتی کونسل میں اس حوالے سے فوری نشست رکھی جائے تاکہ اسرائیل کو لگام دی جا سکے۔
انہوں نے مسلمان حکمرانوں کو متنبہ کرتے ہوئے کہا: اسرائیل جس طرح مسلمان ممالک پر چڑھائی کرتا جا رہا ہے تو اگر آج یہاں اسے مل کر نہ روکا گیا تو کوئی بھی مسلمان ملک اس کی درندگی اور وحشیانہ پن سے محفوظ نہیں رہے گا۔
شیعہ علما کونسل کے مرکزی رہنما نے آخر میں کہا: درست ہے کہ اسرائیل ایٹمی پاور اور ظاہرا بڑی طاقت ہے لیکن لبنان کے لوگ بھی فلسطینیوں کی طرح بہادر، باشعور اور اپنی زمین کا دفاع کرنا جانتے ہیں۔ ان شاءاللہ صہیونیوں کو منہ کی کھانا پڑے گی اور مزاحمتی اور مقاومتی گروہ کامیاب ہوں گے۔ نَصْرٌ مِّنَ اللَّهِ وَفَتْحٌ قَرِيبٌ
